Azken astean hainbat bilera egin dituzte Ukrainako eta Errusiako ordezkariek AEB Ameriketako Estatu Batuetako bitartekariekin, gerra amaitzeko ahaleginean. Bada, egoerak berdin-berdin jarraitzen du, eta bi aldeek eraso egin diote elkarri azken orduetan. Errusiak Kiev jo du gaur goizaldean, eta bi lagun hil eta hamabost lagun zauritu ditu, Ukrainako iturri ofizialek jakinarazi dutenez. Ukrainak, berriz, ehunka drone jaurti ditu Moskura.
Volodimir Zelenski Ukrainako presidenteak X sare sozialean adierazi duenez, Errusiak 200 drone eta hogei misil baino gehiago erabili ditu gaur goizaldeko erasoaldian. Azaldu du Errusiako armadak Dnipro ibaia gurutzatzen duen zubi bat eraitsi duela; baita zibilak bizi diren eraikin bat, tren geltoki bat, eta saltokigune eta energia azpiegitura batzuk ere —tartean, Kremenchuk industriagunea, Ukrainako petrolio findegi handienetako baten egoitza—. Atzo gauean beste eraso bat ere egin zuen Errusiako armadak Kieven, eta sei lagun zauritu zituen.
Errusiako Defentsa Ministerioak Telegramen zabaldu duen oharrean esan duenez, goizaldean egindako erasoek Ukrainako industria gune militarrak zituzten helburu. Baita Kieveko garraio azpiegiturak eta Odesa eskualdeko portuak ere. Era berean, azaldu du Ukrainako erasoek Mosku inguruan dagoen «enpresa militar bat» jo dutela. Hiriburuko alkate Sergei Sobianinen esanetan, Kievek 600 drone baino gehiago erabili ditu erasoaldi horretan.
«Humanitarioen» erasoa
Zelenskik Moskuren erasoa gaitzetsi du, eta sarkasmoa ere erabili du horretarako. X sare sozialean idatzi duen mezuan Steve Witkoff Etxe Zuriaren ordezkariaren hitzak ekarri izan nahi ditu gogora, eta adierazi du Errusiako «humanitarioek» misil balistikoen hiru olde jaurti dituztela goizaldean. Izan ere, Witkoff Vladimir Putin Errusiako presidentearekin bildu zen atzo San Petersburgon (Errusia), eta Errusiako presidentearen «jarrera humanitarioa» goraipatu zuen bilera amaitutakoan —Putinek Errusian preso zegoen Stephen Hubbard estatubatuarra aske uzteko agindu zuen harekin bildu ostean—.
Horrekin batera, Zelenskik adierazi du Errusiaren azken erasoek erakusten dutela Errusiak ez duela jarrera aldatu «bakea» lortzeko bidean. Gainera, ohi duen bezala, azpimarratu du Ukrainak «laguntza militar handiagoa» behar duela Errusiaren erasoak gelditu ahal izateko, eta zigor gehiago ere eskatu ditu Errusiarentzat. Izan ere, Zelenskiren ustez hori da bidea Putinek «berehalako su eten bat» adosteko.
Witkoff Zelenskirekin ere bildu zen Putinekin bildu aurretik. Ez Ukrainak eta ez Errusiak ez dute Witkoffekin hitz egindakoaren xehetasunen berri eman. Baina, oraingoz, bi aldeek konpromisoa hartu dute azaroaren hasieran beste bilera erronda bat egiteko AEBetako bitartekariekin.
