Gaur goizaldean ere elkarri eraso egin diote Ukrainak eta Errusiak, frontetik kanpo. Odoltsuak izan dira eraso horiek Kieven, Ukrainako hiriburuan. Agintariek eman dituzten datuen arabera, gutxienez hamabost lagun hil dira, eta 39 zauritu. Vitali Klitxko Kieveko alkateak ohar batean zehaztu du misilen bidezko erasoa izan dela, eta kalteak eragin dituela zenbait etxetan, osasun zentro batean eta ikastetxe batean.
Volodimir Zelenski Ukrainako presidenteak Errusiaren «eraso masiboa» salatu du, eta gaineratu «denbora luzez prestatutakoa» izan dela. Sare sozialetan idatzitako mezu batean azaldu du Errusiak hainbat motatako munizioak, gurutzaldi misilak eta droneak konbinatu dituela, «azpiegitura zibilari ahalik eta kalte handiena eragiteko».
Horrez gain, Errusiak drone bidez eraso dio Ukrainaren eta Moldaviaren arteko mugako kontrol puntu bati, Odesa eskualdean, baita gas azpiegitura bati ere, iparraldeko Txernihiv eskualdean. «Zoritxarrez, Mosku misil balistikoetan eta gatazkaren gorakadan ari da inbertitzen. Aldi berean, zenbaitetan nazioarteak ez die behar bezala erantzun eraso horiei. Ukrainak nahikoa defentsa ez duen bitartean, Errusiak ez du bakea serio planteatuko», ohartarazi du Zelenskik.
Errusiak Ukrainan egindako azken erasoaren ostean, Poloniak iragarri du «ekintza prebentiboak» abiarazi dituela jada. Herrialdeko armadak oharra igorri du, eta esan du «abiazio militarreko operazioak» hasi dituela herrialdeko aire eremuan, eta «eskura dituen beharrezko baliabideak» aktibatu dituela. «Egoera monitorizatzen ari gara, eta gure indarrek berehala erantzuteko prest jarraitzen dute».
Beste aldetik, Errusiako Defentsa Ministerioak jakinarazi du Errusiako aireko defentsa sistemek Ukrainatik zetozen 726 drone eraitsi dituztela gaur goizaldean. Komunikatuan xehatu du 21 eskualdetan atzeman dituztela droneak, baita Krimeako penintsulan, Itsaso Beltzean eta Azoveko itsasoan ere. Sergei Sobianin Moskuko alkateak sare sozialetan nabarmendu du Ukrainako indarrek 250 drone jaurti dituztela Errusiako hiriburuaren aurka.
Giro nahasia
Aldaketak izan dira Ukrainako Gobernuan azken egunotan, eta nahasia dago herrialdeko politika. Hain zuzen, Zelenskik Mikhailo Fedorov Defentsa ministroa kargugabetu zuen uztailean —Zelenskik bost Defentsa ministro izan ditu gerra hasi zenetik—, eta erabaki horrek protesta handiak eragin zituen. Fedorov luzaz izan zen Zelenskiren aliatu, eta urtearen hasieran hartu zuen ministro kargua. Atzo hartu zuen kargua haren ordez arituko den Defentsa ministroak: Jevheni Khmarak.
Izendapenaren aurretik, baina, Fedorovek bideo bat zabaldu zuen asteartean Youtube plataforman, eta herrialdeko gobernuari eskatu zion hauteskunde orokorretara dei dezala. Adierazi zuen Ukraina «gobernantza krisi bat» ari dela pairatzen. Zelenskik, berriz, sarritan baztertu izan du gerra garaian hauteskunde orokorrak egitea, «segurtasun arriskuak» argudiatuz. 2019an izan ziren azken bozak Ukrainan, eta zazpi urte daramatzate ukrainarrek botorik eman gabe.
%57Ukrainarren ehuneko zenbatek atzeratu nahi dituzten hauteskundeak gerra ondorenerako. Ukrainako herritarren gehiengoak ez ditu hauteskundeak egin nahi Errusiaren inbasioa amaitu arte. Hain justu, Kieveko Soziologia Institutuak abuztu hasieran egindako inkesta baten arabera, ukrainarren %57k pentsatzen dute behin gerra amaitu eta gero egin beharko liratekeela.
Ministro ohiak kaleratutako bideoak harrabotsa sortu du herrialdean. Eta aldaketak egon dira gerora presidentetzan ere. Zehazki, Zelenskik bere bulegoko aholkulariaren albokoa kargugabetu zuen atzo, Irina Mandra, ustelkeria egotzi baitiote.
