Eraso masibo bat egin du Errusiak gaur goizaldean Ukrainaren kontra, eta horren ondorioz gutxienez hamar pertsona hil dira eta dozenaka zauritu. Moskuren bonbardaketek Kiev hiriburua, Kharkiv eta Dnipro jo dituzte, besteak beste. Azken hilabeteotako eraso masiboenetako bat izan da gaurkoa. Errusiaren buruzagitza militarrak nabarmendu du komunikatu batean «Ukrainaren eraso terroristei» emandako erantzuna dela gaurko erasoa.
Ukrainako iturri ofizialek ohar baten bidez jakinarazi dutenez, Errusiak jaurti ditu 73 misil eta 656 drone. Aireko defentsa sistemek 40 misil eta 602 drone erorarazi dituzte.
Hiriburuan lau hildako eta 63 zauritu eragin dituzte aire erasoek. Kontuan hartu behar da duela astebete pasatxo —maiatzaren 24an— ere hiriburua izan zutela helburu Moskuren erasoek, eta orduan gutxienez hiru pertsona hil zirela. Hurrengo egunean bertan, Errusiako Atzerri Ministerioak Ukrainari mehatxu egin zion, Kieven kontrako «bonbardaketa sistematikoak» iragarri baitzituen. Egun batzuk geroago heldu da aurrenekoa.
Goizaldeko erasoak, baina, Dnipro hirian, herrialdearen erdialdean, eragin ditu hildako gehien: sei. Zaurituak, gainera, 36 inguru dira. Hango gobernadore Oleksandr Hanzhak argazki bat jarri du sare sozialetan, zeinean ikusten diren ibilgailuak sutan eta kaltetutako eraikinak.
