Kieven dozenatik gora lagun hil biharamunean, Errusiako armadak eraso hilgarriak egiten jarraitu du beste behin. Gutxienez lau lagun hil ditu bart Ukraina ipar-ekialdeko Lebiazhe herrian drone bidez egindako «eskala handiko» eraso batean, herrialdeko armadak Kharkiv eskualdean duen adarreko buruak sare sozialetan jakinarazi duenez; bonbardaketek suteak piztu dituzte etxebizitzak dauden eremu batean, larrialdi zerbitzuen arabera. Ukrainako aireko armadak ohar bidez Errusiak 135 drone jaurti dituela goizaldera arte, eta ehun baino gehixeago eraistea lortu dutela.
Ukrainako armadak ere ez ditu eten Errusiako petrolio findegien eta energia azpiegituren kontrako operazioak —eta badirudi ondo atera zaiola estrategia hori, Errusiako Izvesta egunkariak asteon kaleratu duenez, herrialdeko gasolindegien bi herenek ez baitute erregai erreserbarik—. Ural mendikatetik mendebaldera den Perm eskualdeko findegi bat bonbardatu du bart irismen luzeko droneak erabilita.
Moskutik mila eta ehun kilometro ingurura dago Lukoil petrolio enpresaren instalazio hori; herrialdeko konpainiarik handiena da Lukoil, eta haren findegirik handiena da, hain justu ere, Perm eskualdekoa; Ukrainako armadaren arabera, urtean hamahiru milioi petrolio upel ekoizteko gaitasuna du, eta Errusiako armada erregaiz hornitzen du. Aurrez ere eraso egin diote findegi horri, uztailaren amaieran eta apirilaren amaieran—. Errusiako aireko agentzia federalak, Rosaviatsiak, adierazi du Perm hiriko aireportua itxiarazi dutela.
Halaber, Ukrainako armadak jakinarazi du Errusia hegoaldeko aireko base bati egin diola eraso, Volgogrado eskualdean, Ukrainaren ekialdeko mugatik hirurehun bat kilometrora. Kalteak aztertzen ari da. Errusiako Defentsa Ministroak ohar bidez jakinarazi duenez, Ukrainatik zetozen 325 drone eraitsi ditu bart.
Bestalde, Ukrainako armadako buru Mikhailo Drapatik iragarri du NATO Ipar Atlantikoko Itunaren Erakundearen Batzorde Militarra Ukrainara joango dela datorren urrian. Adierazi du Giuseppe Cavo Dragone batzorde horretako presidentearekin lehenbiziko elkarrizketa ofiziala eduki duela gaur, eta Facebooken idatzitako mezu batean eman du horren berri.
Zortzi urte dira Batzorde Militarra ez dela joaten Ukrainara, nahiz eta Drapatik gogoratu duen Cavo Dragone hirutan egon dela bertan. «Jakinarazi diot zein den egoera gerra frontean, eta zeintzuk diren gure lehentasunak: irismen luzeko erasoak, taktika malguak infanteriarentzat eta lehenengo lerroa robotizatzea. Aparte hitz egin dugu aireko defentsari buruz; zerua babestea da nire lehentasuna».
Akusazioak Nord Stream hodien harira
Bestalde, Kroaziako instrukzio epaile batek behin-behineko espetxealdia ezarri dio bart Volodimir Zhuravlev ukrainarrari, Nord Stream gas hodien kontrako sabotajearekin zerikusia duelakoan; haren abokatuak eman zuen erabakiaren berri HRT telebista publikoan: «Fiskalaren eskariz ezarri diote, haren kontrako euroagindua dela-eta Alemaniara estraditatu dezaten».
Kroaziako Poliziak herenegun atxilotu zuen herrialdearen mendebaldeko Pula hiriko hotel batean; tokiko hedabideek kaleratu dutenez, nortasun faltsua zuen susmagarriak: sabotaje hori oinarri hartuta Doug Liman zinema zuzendari estatubatuarra grabatzen ari den filmeko aholkularia omen zen.
Alemaniako Justizia Auzitegi Federaleko Fiskaltzak ez du zehaztu iazko udazkenean Polonian atxilotu eta Varsoviako auzitegi batek aske utzi zuen akusatu bera ote den Zhuravlev; orduko hartan, epaile batek ebatzi zuen ez zuela beteko Berlinek emandako euroagindua, herrialdean jurisdikziorik ez zeukala argudiatuta. Zera leporatzen diote ukrainarrari: 2022ko irailean Errusiako gas naturala Alemaniara garraiatzen duten Nord Stream 1 eta Nord Stream 2 hodiak leherrarazi zituzten bonbak jartzea, Itsaso Baltikoan.
Ukrainako militar ohi bat Italian atxilotu zuten iazko udan, Nord Stream hobien kontrako sabotajea antolatzea leporatuta, eta Alemaniara estraditatu zuten; behin-behineko espetxealdian darama azaroaz geroztik Hanburgo hirian. Bada, fiskaltzak energia azpiegitura zibilen kontra eraso egitea leporatu zion uztailaren hasieran —hori gerra krimena da nazioarteko legiaren arabera—.
Errusiak Kuril uharteetan ariketa militarrak egin dituela salatu du Japoniak
Vladimir Putin Errusiako presidenteak bisita ofiziala egin zuen joan den astean Kuril uharteetara. Etorofun izan zen Putin, eta, hain zuzen, herrialdeko itsas armadak ariketa militar bat egin zuen atzo han; abuztuaren hasieran hasi zituzten ariketa horiek, eta hilaren amaierara arte irautekoak dira. Toshimitsu Motegi Japoniako Atzerri ministroak zera salatu zuen: «Ezin ditugu toleratu iparraldeko lau irletan indar militarra sendotzeko ariketak egitea».
Kuril uharteak dute izena; japoniarrek, berriz, Iparraldeko Lurraldeak deitzen diete.
Sobietar Errepublika Sozialisten Batasunak 1945ean hartu zuen kontrolpean Okhotseko itsasoaren eta Ozeano Barearen arteko uhartedi hori, Bigarren Mundu Gerran. Japoniak orduz geroztik salatu du legez kontra okupatzen dituela beretzat dauzkan uhartediko lau uharte.
