Errusiaren erasoaldiek Ukraina izan dute ituan, beste behin. Osteguneko eta ostiraleko bonbardaketek jada 23 lagun hil dituzte Kieven, eta, herrialdeko larrialdi zerbitzuen arabera, Moskuk beste «oldarraldi masibo» bat egin du bart, Ukraina hego-ekialdean: Zaporizhian gutxienez pertsona bat hil da, eta beste 28 zauritu dira; besteak beste, Dnipropetrovsk eskualdean ere entzun dira eztandak. Ukrainako armadaren arabera, 537 drone eta 45 misil jaurti ditu Errusiak, eta gehientsuenak eraistea lortu du.
Errusiako Defentsa Ministerioak, berriz, esan du erasoen asmoa izan dela Ukrainako armadaren azpiegiturak eta armagintza enpresak suntsitzea, eta «helburu guztiak» jo dituela. Kaleratu duen oharrean, adierazi du Errusiaren aireko defentsa sistemek Ukrainaren ehun drone baino gehiago suntsitu dituztela bart. Bestalde, Errusiako armadak aurrerapausoak ematen segitzen du Donetsken: eskualdearen hiru laurden pasatxo kontrolatzen du, eta hango herri bat hartu duela jakinarazi du.
Defentsa Ministerioak inbasioaren egoeraren berri ere eman du Telegram bidez, Valeri Gerasimov Errusiako Estatu Nagusiko buruzagia aipatuz: Errusiako armadak Ukrainako Luhansk eskualde ia osoa kontrolatzen du (%99,7), Donetsk eskualdearen %80, Khersonen %76, eta Zaporizhiaren %74. Lau probintzia horiek partzialki okupatuak ditu Errusiak 2022ko otsaileko inbasioaz geroztik, eta urte hartako irailean anexionatu zituen. Krimea, berriz, 2014an anexionatu zuen. Hortaz, Errusiak Ukrainaren bostena inguru du kontrolpean.
Ukrainako armadak ere jomugan izan ditu Errusiako bi petrolio findegi, droneen bidez. Bata, Krasnodar eskualdean, Itsaso Beltzetik hurbil, eta bestea, Sizran hirian, Samara eskualdean.
Erasoak tarteko, Volodimir Zelenski Ukrainako presidenteak dei egin du diplomaziari «leihoak berriro irekitzeko»; hori lortzeko «modu bakarra», haren iritziz, Moskuren eta Errusiako armada finantzatzen dutenen kontrako «neurri gogorrak» ezartzea da. Banku eta energia sektorekoen kontrakoak, hain zuzen ere. Sare sozialetan idatzi duen mezuan, Zelenskik esan du aliatuen esku dagoela hori: «Ukraina zain dago Ameriketako Estatu Batuek, Europak eta mundu guztiak zer egingo».
Joan den astearen hasieran bildu ziren Zelenski eta Donald Trump AEBetako presidentea, Etxe Zurian. Akordiorik ez zuten egin, baina, gerra amaitze aldera, Trumpek esan zuen Zelenskik eta Vladimir Putin Errusiako presidenteak bildu egin behar zutela. Hori egiteko, Ukrainako presidenteak jakin nahi du zer-nolako segurtasun bermeak emango dizkioten bere aliatuek. Atzo, Kopenhagen bildu ziren EB Europako Batasuneko Defentsa ministroak, eta Ukrainan bertan tropak entrenatzeko aukera izan zuten hizpide, betiere su etena sinatu eta gero.
Gaur, EBko Atzerri ministroak Danimarkako hiriburuan bildu dira, hainbaten artean Ukrainako gerraz eztabaidatzeko. Kaja Kallas EBko diplomaziaburua kazetariekin mintzatu da bilerara joan aurretik, eta esan die Errusiak ez duela nahi «bakerik», nahiz eta «ahalegin diplomatiko mordoa» egiten ari diren Mosku eta Kiev mahaiaren bueltan esertzeko. Europak izoztuak ditu Errusiako Banku Zentralaren 210.000 milioi euroren aktiboak, eta «estrategia» bat behar dutela nabarmendu du: «Ezin dugu imajinatu su etena edo bake akordioa baldin badago aktibo horiek Errusiari itzuliko dizkiogunik, aurrez ez baditu konponketak ordaindu».
ANDRI PARUBI UKRAINAKO PARLAMENTUKO BURU OHIA hil dute tiroz
Andri Parubi Ukrainako Parlamentuko presidente ohia tiroz hil dute gaur eguerdian, atentatu batean, Ukraina mendebaldeko Lviv hirian. 54 urterekin hil da. Volodimir Zelenski Ukrainako presidenteak eman du «hilketa lazgarri» horren berri, sare sozialetan. Erantsi du ikerketa abiatzeko «beharrezko baliabide guztiak» zabaldu dituztela, erasoaren erantzulea atzemateko. Suspilne telebista katearen arabera, banatzaile jantzita zegoen gizon batek egin dio tiro zazpi edo zortzi aldiz. Poliziak ohar bat kaleratu du, eta hartan esan du hor bertan hil dela Parubi.
Svoboda eskuin muturreko alderdiaren sortzaileetako bat izan zen Parubi. 2004ko iraultza laranja izenekoan parte hartu zuen. Izan ere, urte hartako presidentetzarako bozetan, Viktor Janukovitx orduko lehen ministroa atera zen garaile, eta milaka lagun mobilizatu ziren Kieven, irregulartasunak izan zirela salatzeko. Bigarren txanda berriz egitea lortu zuten, eta Gure Ukraina alderdiko Viktor Justxenkok irabazi zituen bozak. Ondoren, 2007an, Gure Ukraina-Herriaren Autodefentsa muturreko koalizioaren diputatu hautatu zuten.
Euromaidan mugimenduaren buruetako bat ere izan zen Parubi, eta 2014ko otsailean, Justxenko presidente errusiazaleak herrialdea utzi ondotik, Ukrainako Segurtasun eta Defentsa Batzordeko idazkaria ere izan zen ia urte erdiz; Errusiaren Krimearen anexioak eta Donbasseko gerrak bete-betean harrapatu zuten, kargu horretan zela. Urte hartako abenduan Parubi hiltzen saiatu ziren; gizon batek granada bat bota zuen politikaria zegoen eraikinera. 2016tik 2019ra, Ukrainako Parlamentuko burua izan zen.
