Ukrainako hiriburua jomugan izan du gaur ere Errusiako armadak, eta gutxienez hemezortzi pertsona hil ditu han, besteak beste lau adingabe. Goizaldean egin du Moskuk Ukrainaren aurkako eraso masiboa: 598 drone eta 31 misil jaurti ditu Ukrainako armadaren arabera. Gainera, hiriburuaren aurkako erasoak 38 pertsona zauritu dituela jakinarazi du Ukrainako Barne Ministerioak, ohar batean. Haietatik 30 erietxetara eraman behar izan dituztela eta hamar haurrak direla zehaztu du The Kyiv Independent egunkariak, iturri ofizialak aipatuz.
Egunkariko kazetarien arabera, atzo gauean hasi ziren Ukrainako hiriburuan leherketak entzuten, eta Vitali Klitxko alkateak jakinarazi zuen martxan jarri zituztela aireko defentsa sistemak. Geroago, gaur goizeko hirurak aldera, Moskuk misilak jaurti ditu Kievera. Eta pare bat ordu geroago, 05:30 aldera, larrialdi zerbitzuak oraindik lanean ari zirela, Moskuk beste bonbardaketa batzuk egin ditu.
Hiriburuan egindako aire erasoek etxebizitza eraikinak suntsitu dituzte, eta kalteak eragin dituzte, besteak beste, merkataritza guneetan, haurtzaindegi batean, Ukrainska Pravda egunkariaren egoitzan, Erresuma Batuko British Council kultura erakundearen egoitzan eta EB Europako Batasunaren Ukrainako ordezkaritzan.
EBren egoitzaren aurkako erasoa «nahita» egina izan dela salatu du Antonio Costa Europar Kontseiluko presidenteak, sare sozialetan. Eta argi utzi nahi izan du: «EB ez da izutuko». Ursula von der Leyen Europako Batzordeko presidenteak prentsaurreko batean argitu du erasoan ez dutela EBren ordezkaritzako langilerik zauritu, baina jakinarazi du Errusiak bi misil jaurti dituela EBren egoitzatik 50 metrora: «Errusiak zibilak hiltzen jarraitzen du Ukrainan, baita Europako Batasuna jomugan jartzen ere. Horregatik jarraitzen dugu Errusiari presio egiten».
Gaurko erasoa gaitzetsi du Volodimir Zelenski Ukrainako presidenteak, sare sozialetan. Deitoratu du Moskuk ez duela gerra amaitu nahi: «Misilekin eta droneekin egindako eraso hauek hainbat astez eta hilabetez su etena eskatzen aritu direnei emandako erantzuna izan da. Errusiak balistikaren alde egin du negoziazio mahaiaren alde egin ordez. Gerrari amaiera eman beharrean, jendea hiltzen jarraitzea erabaki du. Errusia ez da ondorioen beldur».
Negoziazioak bai, gerra ere bai
Abuztura arte Moskuk behin baino gehiagotan egin du Ukrainako hiriburuaren aurka, baina, azken hilabetean, ez zuen gaurkoaren neurriko erasorik egin Kieven. Tarte horretan, Ukrainarako akordio bat negoziatzeko zenbait bilkura egin dituzte. Gaurko erasoen ostean ere, Errusiak negoziazioetan jarraitzeko asmoa duela argitu du Dmitri Peskov Kremlinen bozeramaileak. Halere, egunero eman ohi duen prentsaurrekoan gogorarazi du, negoziazio mahaian esertzeko asmoa badu ere, «operazio militarrak aurrera jarraitzen» duela.
Abuztuko lehen astean, Steve Witkoff Washingtonen ordezkaria Vladimir Putin Errusiako presidentearekin bildu zen, Moskun. Horren ostean iritsi zen albistea: Putin Donald Trump AEBetako presidentearekin elkartuko zen. Hilaren 16an bildu ziren bi estatuburuak, Anchoragen (Alaska). Baina Bering itsasartean ito zen Ukrainarako menia bat onartzeko esperantza. Tregoarik adostu gabe itzuli zen Putin Moskura, eta, Trumpen arabera, orain lehentasuna «bake akordio bat» ontzea da. Horretarako, Etxe Zuriko maizterra Zelenskirekin batzartu zen Washingtonen, Alaskako bilkuratik bi egunera. AEBetako presidenteak Ukrainakoari «lurralde truke posibleez» hitz egitera deitu zion. Bilkura erronda horren ostean, mahai gainean jarri zuten Trump, Putin eta Zelenski aurrez aurre biltzeko aukera, baina, gaur-gaurkoz, bilkura horrek airean jarraitzen du.
kim eta putin xirekin bilduko dira pekingo desfile militarrean
Datorren asteazkenean, irailaren 3an, Garaipenaren Eguna ospatuko dute Pekinen. Orduan beteko dira 80 urte Japoniak errendizioa sinatu eta Bigarren Mundu Gerra amaitu zenetik. Egun horretan, desfile militarra egingo dute Txinako hiriburuan, eta Xi Jinping Txinako presidentearekin bilduko dira, besteak beste, Vladimir Putin Errusiako presidentea eta Kim Jong-un Ipar Koreakoa. Gaur jakinarazi du KCNA Ipar Koreako albiste agentzia nazionalak Kim Pekinen izango dela asteazkenean; 2019tik lehen aldiz bidaiatuko du Txinara Ipar Koreako liderrak. Hiru horietaz gainera, Garaipenaren Eguneko ospakizunetan mundu osoko hogeitik gora gobernuburuk hartuko dute parte; besteak beste, Masud Pezexkian Irangoak, Shehbaz Sharif Pakistangoak, Alexandr Lukaxenko Bielorrusiakoak, Miguel Diaz-Canel Kubakoak eta Robert Fico Eslovakiakoak.
