Babesa jaso du Amnistia Legeak. Izan ere, Dean Spielmannek, EB Europako Batasuneko Justizia Auzitegiko abokatu nagusiak, adierazi du ez duela urratzen EBren eskubiderik. Hortaz, epaiak bide ematen du amnistia emateko 2017ko urrian Kataluniako presidente eta presidenteorde zirenei, alegia, Carles Puidgemonti eta Oriol Junquerasi; baita gobernukideei eta prozesu subiranistan delituengatik akusatutakoei ere.
Espainiak aurkeztutako kereilei erantzun die abokatuak. Bada, Espainiako bi auzitegik legearen inguruko zalantzak igorri zizkioten EBri aurreko hilabeteetan. Batetik, Espainiako Auzitegi Nazionalak eta Kontu Auzitegiak adierazi zuten lege hori aplikatzea EBren finantza interesen aurkakoa izan zitekeela. Eta bestetik, auzitegiari galdegin zioten ea legea Generalitateko 30-40 kargudun ohiri aplikatzeak berdintasun printzipioaren kontra egin zezakeen.
Bi zalantza horiei erantzun die Spielmannek, eta azaldu, batetik, 2017ko prozesu subiranistaren baitan akusatutako kideen amnistiak ez liekeela inolako kalterik eragingo EBren finantzei: «Ez dago inolako lotura zuzenik ekintza horien eta EBren aurrekontuetara bideratutako diru sarreren murrizketaren artean». Bestetik, adierazi du lege horrek «sistema demokratiko plural batean izan den prozedura parlamentario baten emaitzari» erantzuten diola, eta ez dela «botere autoritario batek inposaturiko ekintza izan».
Luxenburgon plazaratu du bere iritzia gaur goizean abokatuak, han baitu egoitza EBko Justizia Auzitegiak. Iritzi hori ez da loteslea, baina orientagarria izan ohi da auzitegiaren ebazpenean. Orain, auzitegiko hamabost magistratuek onartu beharko dute legea behin betiko ezar dadin, eta prozesu horrek asteak edo hilabeteak iraun ditzake.
