Mendebaldeko Sahararen parean gertatu den hondoratzearen berri arrantzale batzuek eman dute, eta Marokoko itsas armada joan da erreskatera. Eferen arabera, hamar migratzaile bizirik atera dituzte uretatik. Mendebaldeko Saharako Dakhla hiriko itsasbazterretik hogei kilometrora izan da ezbeharra.
Beste hondoratzea Mauritaniako Nuadhibu hiriaren parean gertatu da. Erreskate taldeek pertsona bakarra topatu dute bizirik. Efe agentziaren arabera, ontzia duela egun batzuk noraezean gelditu zen matxura baten ondorioz, eta haren bila ari ziren erreskate taldeak.
Efe agentziak dioenez, Saharaz hegoaldeko herrialdeetakoak dira bi hondoratzeetan zendu direnak —Mauritanian bizirik topatu dutena Gambiako herritar bat da—. Kanaria uharteetara iritsi nahi zuten.
Gaurko biekin, aste honetan guztira hiru dira Kanaria uharteetara bidean hondoratu diren ontziak. Joan den astelehenean, Marokoko itsas indarrek zazpi gorpu aurkitu zituzten beste hondoratze batean, eta 40 pertsona erreskatatu zituzten.
