Hong Kongeko Auzitegi Nagusiak gaur ebatzi du legez kontrakoa dela sexu berekoen bikoteen eskubideak mugatzea etxebizitza publikoa eskuratzeko orduan eta herentzia bat jasotzerakoan. Aurrez, epaitegi berak ebatzi zuen sexu orientazioagatik etxebizitzaren eta herentziaren aferetan tratu ezberdina emateak Hong Kongeko Oinarrizko Legea urratzen zuela. Gobernuak, ordea, helegitea jarri zien epai haiei. Gaur, Auzitegi Nagusiak erabakia berretsi du, eta ebatzi politika baztertzaile horiek legea urratzen dutela.
LGTBI komunitateak eskubide mugatuak ditu Hong Kongen; esaterako, legeak ez du onartzen sexu berekoen ezkontzarik. Azken urteetan, ordea, lurralde horretako auzitegiek zenbait epai eman dituzte sexu berekoen bikoteen eskubideen alde. Hong Kongeko LGTBI komunitateak garaipentzat hartu du auzitegiaren ebazpena.
