Iranek esan du inguruko herrialdeetara egindako bonbardaketak etengo dituela

Masud Pezexkian Irango presidenteak iragarri du ez dituztela erasoaldi gehiago egingo inguruko herrialdeetan, goizaldean egindako agerraldi batean. Azken egunetan botatako misilengatik barkamena eskatu du, jakitun baitira nazioarteko arauak urratu dituztela. Hori bai, presidenteak zehaztu du ez diela ondoko herrialdeei eraso egingo eta misilik jaurtiko, betiere haiek lehenago eraso egiten ez badiete, hau da, estatubatuarrek herrialde horietan dituzten base militarrak erabiltzen ez badituzte. Pezexkianek jakinarazi du hori erabaki zuela atzo Iranen behin behineko agintaldian dagoen kontseiluak. 

Presidenteak dei egin die herritarrei Iranen burujabetza defendatzera. Estatubatuarrei ere zuzendu zatzaie: argi esan die baldintzarik gabe amore ematea nahi dutela, eta «amets hori hiltzera arte» mantenduko dutela. Orain arte erabili ez dituzten armak erabili dituztela ere mehatxu egin dute. Antzerako mintzatu zen Donald Trump Amerikako Estatu Batuetako presidentea atzo, esan baitzuen ez duela onartuko Iranen «baldintzarik gabeko errendizioa» baino.

Bitartean, Israelgo armadak erasoaldi gehiago egin ditu gaualdean, horietako bat Teheranen. Irandarrak leherketa hotsen artean jaiki dira, AEBek eta Israelek botatako bonben ondorioz. Al Jazeera hedabideak Nazi Abaden izandako leherketaren bideo bat zabaldu du. Nazi Abad Teherango hiri erdiguneko hegoaldean dago. 

AEBek eta Israelek Iranen abiatu zuten erasoaldiak astebete egin zuen atzo. Are, Trumpek esan berri du Iranen «dena desegiten» ari direla. Berretsi du Iranen kontrako erasoak ez direla geratuko aiatolen erregimenak AEBak errespetatzen dituen buruzagi berri bat hautatu arte. 

Erasoaldi gehiago Libanon

Israelek hamasei pertsona hil ditu Libanoko Nabi Chit herrian bart, bertako osasun arduradunen arabera. Beste 35 pertsona zauritu dituzte. Erasoaldia hasi zenetik berrehun pertsona baino gehiago hil dituzte Libanon, eta 95.000 pertsonak alde egin behar izan dute beren etxeetatik.