Atzo, Turkiak salatu zuen Iranen misil bat eraitsi zutela NATO Ipar Atlantikoko Itunaren Erakundeko aireko defentsa sistemek, eta ohartarazi «edozein ekintzari erantzuteko eskubidea» dutela. Teheranek, ordea, hedabideen bitartez ukatu egin du misil hori jaurti izana, eta «Turkiaren subiranotasuna» errespetatzen duela adierazi du. Hala ere, Irakeko kurduen aurka egin du Teheranek, eta oposizioari ohartarazi dio ez dezala gobernuaren aurkako ekintzarik egin: «Ez dugu tolerantziarik izango», adierazi du Irango Segurtasun Gaietako buru Ali Lariyanik.
Teheranek gaur goizean jakinarazi du Irakeko zenbait talde kurduri eraso egin diela. Adierazi duenez, jakin dute AEB Ameriketako Estatu Batuek milizia kurduak armatzeko asmoa zeukala, Iranen infiltratzeko. Horrez gain, Teheranek Israelen eraso gehiago egin ditu gaur goizean, Israelgo armadak adierazi duenez. Bitartean, Tel Avivek Teheranen eta Beiruten eraso egiten jarraitzen du. Gaur goizean airez egindako eraso batek Hezbollahren gotorlekua jo duela jakinarazi du EFE albiste agentziak. Gainera, Libanoko Osasun Ministerioak adierazi du hiru pertsona hil direla azken orduetan Israelgo armadak droneekin egindako eraso batean. Informazio horren arabera, errepidean egin du eraso Israelek, zenbait autoren aurka.
Kurduak eta oposizioa jomugan jarri ditu gaur goizean Teheranek, eta Lariyanik ohartarazpen bat egin die. Izan ere, AEBetako presidente Donald Trumpek larunbatean esan zuen erasoen xedea zera zela: «Irango erregimena amaiaraztea, eta Irango herria matxinatzea, boterea har dezan». Bada, Lariyanik halakorik ez egitea gomendatu dio oposizioari: «Talde separatistek ez lukete egungo egoera aukera gisa hartu behar». Hala ere, Karoline Leavitt Etxe Zuriko bozeramaileak atzo adierazi zuen «guztiz faltsua» dela AEBek talde kurduak armatzeko asmoa daukatela Irango Gobernuaren aurka altxa daitezen.
1.332AEBen eta Israelen zenbat eraso erregistratu diren bonbardaketak hasi zirenetik. Irango Gurutze Gorriak adierazi du AEBetako eta Israelgo armadaren 1.332 eraso erregistratu direla Iranen larunbatean bonbardaketa abiatu zutenetik. Horrez gain, erakundeak jakinarazi du jada 1.000 direla eraso horietan hildako pertsonak.
Bestalde, Irango Atzerri ministro Abbas Araghtxik X sare sozialean idatzi du AEBek «ankerkeriaz» jardun zutela atzo, Iranen gerraontzi bat hondoratu baitzuten Indiako ozeanoan, eta gutxienez 87 soldadu hil —guztira, 130 soldadu zeuden ontzian erasoa gertatu zenean—. «AEBek aurrekari bat ezarri dute, eta gogotik damutuko dira».
Irango Guardia Iraultzaileak, berriz, gaur adierazi du Ormuzko itsasartea —munduko petrolio guztiaren %20 igarotzen da hortik— errepublika islamiarraren esku dagoela «nazioarteko legeen arabera», eta ohartarazi ezarrita dauden protokoloak betetzen ez dituzten ontziei eraso egiteko eskubidea daukatela. Esaterako, guardia iraultzaileak adierazi du AEBetako petroliontzi bati eraso egin diola Persiar Golkoan, eta ontziak su hartu duela.
