Israelek eta AEB Ameriketako Estatu Batuek Iran, Libano eta inguruak bonbardatzen jarraitzen dute. Leherketa handi bat izan da gaur goizean Teheranen, eta handik gutxira jakinarazi du Israelgo armadak beste «eraso masibo bat» abiatu duela Irango Gobernuak Teheranen dauzkan azpiegituren aurka. Era berean, Hezbollahk «Beiruten dituen» azpiegituren aurkako erasoaldia abiatu duela ere jakinarazi du Tel Avivek.
Libanoko Albiste Agentzia Nazionalak zabaldu duenez, Israelek hamabi lagun hil ditu gaur abiatu dituen bonbardaketetan. Hildakoez gain, 23 lagun zauritu direla, eta beste bi pertsona desagertuta daudela adierazi du. Irango erasoetan, berriz, bost lagun hil direla jakinarazi du Irango Tasnim albiste agentziak; denak Isfahan probintzian.
Israelgo Defentsa ministro Israel Katzek gaur goizean esan du Israelgo armadak «Irango erregimen terroristak» aukeratzen duen edozein buruzagi hilko duela. «Ez dio axola zein den bere izena edo non ezkutatzen den. Ezabatzeko helburu argia izango da». Horrez gain, Katzek gaineratu du Israelek AEB Ameriketako Estatu Batuekin batera Irani eraso egiten jarraituko duela, Iranen gaitasunak «deuseztatzeko» eta «Irango herritarrek gobernua bota dezaten baldintzak sortzeko».
Israelgo armadaren bozeramaile Effie Defrinek, berriz, Iranek misilak jaurtitzeko daukan ahalmenaz ohartarazi nahi izan du gaur egindako agerraldi batean. Defrinen esanetan, Israelgo armadak Irango hainbat misil jaurtigailu suntsitu ditu azken egunetan, baina ohartarazi du oraindik ere «esanguratsua» dela Iranen misilak jaurtitzeko ahalemana.
Iranen kasuan, Teheranek gaur goizean jakinarazi du 230 droneekin egin diela eraso AEBek Iraken eta Kuwaiten dituzten instalazioen aurka. Besteak beste, Erbil hirian daukaten base bati egin diote eraso, Iraken, eta Ali Al Salemen aire-baseari eta Arifijan kanpalekuari, Kuwaiten.
Irango Atzerri Ministro Abbas Araghtxik X sare sozialean idatzi du Trumpek «traizio» egin diela «diplomaziari eta presidente kargurako aukeratu zuten AEBetako herritarrei». Izan ere, Atzerri ministroak gogorarazi du bi aldeak Iranen programa nuklearrari buruz negoziatzen ari zirela AEBek eta Israelek Irani eraso egitea erabaki zutenean. Bide beretik, Ali Khamenei Irango buruzagi gorenaren aholkulari nagusi Mohammad Mokhberrek Irango telebistan adierazi du Teheranek ez duela AEBekin negoziatzeko asmorik, eta ez duela inolako kontakturik mantendu Washingtonekin. «Ez geneukan konfiantzarik haiengan, eta ez daukagu negoziatzen hasteko inolako euskarririk», esan du. Horrez gain, ohartarazi du Teheranek «nahi bezainbeste» jarraitu dezakeela gerrarekin.
Bestalde, gaur egingo diote azken agurra Ali Khamenei Irango buruzagi gorenari. Haren zaleek Imam Khomeini Mosalla meskitan esango diote agur, gaur, Euskal Herrian 19:30ak direnean. Ez dute xehetasun handirik eman ekitaldiaren inguruan, baina Tasnim agentziak jakinarazi du hiru egun iraungo duela oroitzapenezko zeremoniak, eta Mashhad hirian lurperatuko dutela Khameneiren gorpua, haren jaioterrian.
Merkataritza harremanak
Donald Trump AEBetako presidenteak Espainiaren eta bertako presidente Pedro Sanchezen aurka egin zuen atzo emandako prentsaurrekoan, Iranen aurkako gerran Espainiako presidenteak hartu duen jarreragatik. Etxe Zuriko maizterrak esan zuen Espainia aliatu «ezin txarragoa» dela, eta bi herrialdeen arteko merkataritza harreman guztiak etetearekin mehatxu egin zuen. Bada, Txinako Atzerri Ministerioaren bozeramaile Mao Ning Trumpek erakutsitako jarreraren aurka agertu da gaur. «Merkataritza ez da arma edo tresna gisa erabili behar», adierazi du Txinako bozeramaileak gaur emandako prentsaurreko batean. Gaineratu duenez, 470 txinatar ebakuatu ditu Txinako Gobernuak Irandik.
