Israelek erabat itxiko du Zisjordania, eta operazio militar bat hasiko du, Hebronen tiroketa bat izan ostean

Israelgo indarrek bi palestinar hil dituzte, erasotzaileak zirela argudiatuta, eta palestinarrek Israelgo bost soldadu zauritu dituzte. Bi larri daudela jakinarazi dute larrialdi zerbitzuek. Netanyahuk ez du argitu noiz arte itxiko duen Zisjordania.

Israelgo armadako soldadu batzuk Hebron inguruan, gaur, Zisjordania erabat ixteko prest. EFE
Israelgo armadako soldadu batzuk Hebron inguruan, gaur, Zisjordania erabat ixteko prest. EFE
Beñat Mujika Telleria.
2026ko urriaren 23a
12:43
Entzun 00:00:00 00:00:00

Israelgo Legebiltzarrerako hauteskundeak egiteko egun gutxi falta diren honetan, Israelgo estatu indarrek bi lagun hil dituzte gaur Zisjordanian. Tel Aviven arabera, hildakoak palestinarrak ziren, eta beste hainbat kiderekin zeuden. Armak zeuzkatela azaldu dute, eta hainbat tiro egin dituztela Israelgo kolonoen aurka. Israelgo soldaduek «aurre» egin diete «erasotzaileei», eta horietako bi hil dituzte. Hala ere, Tel Avivek jakinarazi du Israelgo armadako bost soldadu zauritu dituztela, eta horietako bi larri daudela. Israelgo lehen ministro Benjamin Netanyahuk Zisjordania erabat ixteko agindu du, eta «operazio militar bat» ere iragarri du. 

«Jokaleku zail batera iritsi gara, oraindik tiro hotsak entzuten zirela. Anbulantzia blindatu bat erabili dugu, eta berehala hasi gara zauritutakoak handik ateratzen laguntzen», adierazi dute Israelgo larrialdi zerbitzuek, sare sozialetan zabaldu duten ohar batean.

Zauritutako soldaduetatik bi larri daudela ohartarazi dute estatu indarrek, eta bat, «erdibideko larritasun baten» barruan. Beste biek, berriz, zauri arinak dituzte. Hala ere, Jerusalemgo Shaare Zedek eta Hadasah Ein Kerem ospitaleetara eraman dituzte bostak.

«Eskala handiko» operazioa

Gertaeraren berri izan eta berehala agindu du Netanyahuk gaurtik aurrera Zisjordania «guztiz» ixteko. Hala ere, ez du adierazi erabaki horrek noiz arte iraungo duen. «Israelgo Defentsa eta Segurtasun Indarrei agindu diet Hebron hiria berehala inguratzeko eta presta daitezela Judea eta Samaria eskualde osoa [hala deitzen diote israeldarrek Zisjordaniari] gaurtik aurrera erabat ixteko», idatzi du Netanyahuk sare sozialetan.

«Eskala handiko» operazio militar baten berri ere eman du lehen ministroak. «Israelgo Defentsa eta Segurtasun Indarrak terroristak hazi diren auzoetan sartuko dira, herritarrak ebakuatuko dituzte, etxe guztiak miatuko dituzte, azpiegitura terrorista guztiak suntsitu arte», adierazi du sareetan zabaldu duen bideo batean. Gainera, azpimarratu du «Sei Eguneko gerraz geroztik» —1967an izan zen— ez dela halako operazio militarrik ikusi.

Horrez gain, Netanyahuk ohartarazi du Israelek Zisjordanian dituen kokalekuen azpiegitura indartuko duela —nazioarteko zuzenbidearen arabera, legez kanpokoak dira kokaleku horiek—, eta nabarmendu du gobernua lurralde horretan «beste ehun komunitate baino gehiago» ezartzeko lanean ari dela. Asteartean dira bozak egitekoak.

Aurrez, Israelgo lehen ministroak bertan behera utzi ditu Likud bere alderdiak gaur goizean hauteskundeekin lotuta zeuzkan ekitaldi guztiak. Hala jakinarazi du alderdiak berak, sare sozialetan.

Armadak, bestalde, adierazi du inguruak miatzen jarraitzen dutela «erasotzaile» gehiagoren bila. Baina, oraingoz, ez dute ziurtatu zenbat pertsonak hartu duen parte «erasoaldian». Eta ez dute daturik eman «eraso egin dieten» kolonoen inguruan.

Horren guztiaren harira, gogorarazi behar da B'Tselem Lurralde Okupatuetako Giza Eskubideez Informatzeko Israelgo Zentroaren arabera 2023ko urriaz geroztik gutxienez 35 palestinar hil dituztela Israelgo kolonoek.

Yesh Din GKE gobernuz kanpoko erakundeak, horrekin lotuta, israeldarrek Zisjordanian egiten dituzten erasoak aztertu zituen abuztuan, eta ohartarazi zuen palestinarren aurkako indarkeria areagotzen ari direla. Gaineratu zuen palestinarrak beren lurretatik kanporatzen ari direla, izua sentiaraziz eta haien gainean duten kontrola sendotuz.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA