Maliko Osasun Ministerioak adierazi duenez, emakume maliar bat bederatzi umez erditu da Marokoko ospitale batean. Ekografietan bi haur gutxiago atzeman zituzten, baina bederatzi izan ditu azkenean. Zesarea egin behar izan diote.
Haliam Cisse izeneko emakumeak bi aste eman zituen Bamakoko erietxe batean, baina Bah Ndaw Maliko behin-behineko presidenteak Cisse Marokoko ospitale batera lekualdatzeko baimena eman zuen martxoaren 30ean, haurdunaldi berezia zelako: zazpi umez erdituko zela uste zuten.
Bi herrialdeetan egin zizkioten ekografiek hori erakusten zuten, baina bederatzi izan ditu azkenean. Maliko Osasun Ministerioak zabaldu du informazioa, eta esan du ama eta umeak «ondo» daudela. Inoiz jaso den erditzerik handiena da Cisserena.
