Frantziako presidente izan nahi zuen, baina baliteke aurkezteko ere aukerarik ez izatea. Marine Le Pen Batasun Nazionaleko (RN) buruak bere etorkizun politikoa jokatuko du Parisko Dei Auzitegian, gaur hasi eta otsailaren 12a arte. Iazko martxoan erruduntzat jo zuten lehen instantzian, Europako Parlamentuko funtsak bidegabe erabiltzeagatik, eta inhabilitatu egin zuten. Eskuin muturreko buruak helegitea jarri ondotik, berriz aztertuko dute kasua. 2027ko Frantziako presidentetzarako hautagai izatea dago jokoan.
Lau urteko espetxe zigorra ezarri zioten Le Peni, horietako bi gibelapenarekin, eta 100.000 euroko isuna ere bai. Akusazioaren arabera, alderdiko langileak ordaintzeko erabili zuten Europako Parlamentuak eurodiputatuentzako laguntzaileak kontratatzeko emandako dirua. Epaileek zehaztu zutenez, 4,6 milioi euro desbideratu zituen alderdiak hiru legegintzalditan, 40 kontraturen bidez. Europarlamentuaren arabera, 6,8 milioi desbideratu zituen RNk alderdiko langileak ordaintzeko.
Le Penez gain, alderdiko beste 23 kide ere erruduntzat jo zituen epaitegiak; orotara, hamabi dira helegitea jarri dutenak.
RNko buruak errugabea dela errepikatu du behin eta berriz, eta «auzi politikoa» dela salatu zuen iazko martxoan. Ez dirudi defentsa estrategia aldatuko duenik ondoko asteetan. Frantziako hedabideetan zabaldutakoaren arabera, baina, alderdi barruan ez dute esperantza handirik epaitegiak bestelako erabaki bat har dezan. Uda gabe espero da epaimahaiaren ebazpena.
Parisko Dei Auzitegiak Le Penen inhabilitazioa berresten badu, Jordan Bardella izanen da ezbairik gabe eskuin muturrak heldu den urteko hauteskundeetara aurkeztuko duen hautagaia.
