Microsoftek atzo arratsaldean jakinarazi zuen bere zerbitzuetako asko erori zirela, eta hainbat ordu igaro ostean oraindik ez dute arazoa konpontzerik lortu. Microsoftek berak gaur goizean zabaldutako ohar batean adierazi du hainbat modutan ahalegindu direla irtenbide bat bilatzen, baina ez dutela funtzionatu. Mundu osoan izan du eragina, batez ere Outlook eta Teams aplikazioetako erabiltzaileengan.
Teamsen, esaterako, taldeetako oinarrizko deiek eta mezularitza sistemak funtzionatzen dute. Baina erabiltzaileek ezin dituzte egutegian bilerak programatu edo ikusi; ezta zuzeneko ekitaldiak sortu ere. Outlooken, berriz, zailtasunak dituzte aplikazioan sartzeko, eta sartzea lortzen dutenek arazoak dauzkate mezu elektronikoak bidaltzeko.
Hasieran, enpresak atzo aitortu zuen posta elektronikora sartzeko arazoak identifikatu zituela AEBetako erabiltzaileetan. Eta ordu batzuk geroago iragarri zuen arazo hori munduko hainbat herrialdetara zabaldu zela. Gaur, Microsoftek berak baztertu egin du zibereraso bat jasan izana. Charles Lamanna Microsoften zuzendariorde exekutiboak zabaldu du oharra, X sare sozialean: «Oraingoz, baieztatu dezaket ez dagoela zantzurik pentsatzeko arazoa jarduera maltzur edo zibernetiko batek eragin duela». Azaldu duenez, azpiegituran «karga handia» dagoelako gertatu da etenaldia.
Gaur goizaldean eguneratu du hasierako txostena Microsoftek. «Arazoak dauzkagu oraindik ere. Zenbait makina blokeatuta gelditzen dira, eta horrek eragotzi egiten du aldaketak guk espero genuen bezala sinkronizatzea», ohartarazi du enpresak. Hala ere, azpimarratu du azken eguneraketan «emaitza positiboak» ikusi dituztela zerbitzuaren egonkortasunari dagokionez.
Lamannak deitoratu egin du etenak zerbitzuetan eragina eduki izana, eta azpimarratu du lanean ari direla zerbitzu guztiak bere onera itzul daitezen.
Urtebetean bigarren aldiz erori dira Microsoften zerbitzuak. AEB Ameriketako Estatu Batuetako enpresak orduko hartan azaldu zuen matxuratutako zerbitzariak doitu zituztela. Baina bigarren akatsak agerian utzi du ez zela nahikoa izan, eta zalantzan utzi du bere fidagarritasuna.
