AEBen eta Venezuelaren arteko tentsioak gorantz jarraitzen duen honetan, NBE Nazio Batuen Erakundeak berriro belarrietatik tira egin dio Caracasi. Izan ere, erakunde horren misio independente batek egotzi dio Guardia Nazional Bolivartarrari giza eskubideak urratzea eta gizateriaren aurkako krimenak egitea azkeneko hamarkadan. NBEk 2014an sortu zuen batzorde hori, aztertzeko zein den giza eskubideen egoera Venezuelan.
Ikusi gehiago
Armadaren barruko atal bat da Guardia Nazional Bolivartarra, eta NBEren misio horrek gaur kaleratutako txostenean —123 orrialde ditu—, haren buruzagiak jo dituzte atxiloketa arbitrarioen, torturen, sexu indarkeriaren eta «tratu krudelen» erantzule. Protestetarako ezarritako operazioetan eta «jazarpen politiko selektiboko» ekintzetan egin zituzten aipatutako urraketak. Marta Valiñas portugaldarra buru duen misioak ondorioztatu duenez, «inpunitate testuinguru batek» erraztu egin ditu gehiegikeria horiek.
Azken urteetan nahiko ohikoa bihurtu da NBEk Venezuela salatzea, giza eskubideak urratzen dituela leporatuta. Iazko urrian, esaterako, antzeko txosten bat kaleratu zuen misio horrek, eta adierazi uztailaren 28an egindako presidentetzarako bozen testuinguruan gizateriaren kontrako krimenak egin zituela Venezuelako Gobernuak.
Gisa horretako txosten bat kaleratua den aldiro, gezurretan aritzea egozten dio Nicolas Maduro Venezuelako presidenteak NBEri. Gaur kaleratutako ikerketan dioenez, Caracasko agintariek erabaki zuten armadaren eta Poliziaren funtzioak Guardia Nazional Bolivartarrean uztartzea, eta horrek legitimatu zuen «herritarren segurtasunaren izenean» militarizazio bat bultzatzea. Aintzat hartu behar da Maduro bera dela armadaren burua.
«Aberastasuna» helburu
Txostenean zera ikertu dituzte, batik bat, 2014an, 2017an, 2019an eta iaz gobernuaren aurka egindako protestak. Horietan Guardia Nazional Bolivartarrak indarra «neurriz kanpo» erabili zuen.
Bestalde, AEBek atzo Venezuelako kostaldearen pareko uretan konfiskatutako petroliontziaren harira, Caracasek esan du Washingtonek «lapurreta nabarmen bat» egin duela, «nazioarteko krimen larri bat» dela, eta operazio horrek finean helburu dituela Venezuelako «petrolioa, energia eta baliabideak».
