Azken boladan, Ameriketako Estatu Batuek hainbat estrategia probatu dituzte Ekialde Hurbileko gatazkaren harira: otsailaren 28az geroztiko erasoaldia, Israelekin batera; akordioren bat lortzeko negoziazioak, Pakistan bitartekari dela; su etena, hauskorra izanagatik ere, indarrean da eskualdean; eta Irango portuen blokeoari ere eusten ari dira. Donald Trump presidenteak Ormuzen esku hartzeko beste operazio bat iragarri zuen herenegun, Askatasuna proiektua delakoa, itsasarte horretan ez atzera eta ez aurrera dauden ontziak eskoltatzeko; gaur, ordea, hura «epe labur baterako» etengo duela esan du sare sozialetan, hori adostu duela Teheranekin, ikusteko ea itunen bat «lortzea eta sinatzea» posible den.
Erabaki hori hartzeko argudioak ere plazaratu ditu: «egundoko garaipen militarra» lortu izana, Pakistanek eta beste zenbait herrialdek —ez ditu zehaztu zeintzuk— jarrera gerrazalea bazter uzteko eskatu diotela, eta «Irango ordezkariekin» hitzarmen bat erdiesteko «aurrerabideak».
Halere, ikusi beharko da bi aldeek Islamabaden apirilaren 11n eta 12an egindako elkarrizketa saioei berriro ekingo ote dioten; orduz geroztik ez dira bildu Washingtonen eta Teheranen ordezkaritzak, nahiz eta Etxe Zuriak gatazka konpontzeko pare bat proposamen jaso dituen —atzera bota ditu, argudiatuta Iranek azkenerako utzi nahi dituela programa nuklearrari buruzko negoziazioak—.
Islamiar errepublikako agintariek ez dute baieztatu AEBekin Askatasuna proiektua bertan behera uztea adostu dutenik, ezta erabaki horri buruzko komentariorik egin ere. Hori bai, Tasnim albiste agentziak, Irango Guardia Iraultzailearekin lotura duenak, idatzi du Trumpek atzera egin behar izan duela, eta operazioak «porrot» egin izana «ezkutatzen» saiatu dela.
AEBetako presidentearen iragarpenarekin kointziditu du Iranek Ormuzen duen eragina blindatzeko azken ekinaldiak —gatazka areagotu zenetik blokeoa du ezarria armadak—. Herrialde hartako hedabideek gaur kaleratu dutenez, gobernuak itsasarteko nabigazioa kudeatzeko erakunde bat sortu du, Persiar Golkoko Itsasarteko Agintaritza. Ormuz gurutzatu ahal izateko prozeduraren berri ere eman dute: itsasontzien konpainiek forlumario bat bete beharko dute, bidesaria ordaindu beharko dute, eta ondoren posta elektronikoz helduko zaie baimena. Dagoeneko apirilaren amaieran, Irango Parlamentuko presidenteordeak ziurtatu zuen zenbait ontzik ordaindu egin zutela itsasartea zeharkatzeagatik.
Informazio gehiago, laster.
