Borroka handiak izan dira asteburuan Afganistanen eta Pakistanen artean, bi herrialdeen arteko mugan; hain zuzen ere, inoizko borroka bizienak izan dira duela lau urte talibanak agintera bueltatu zirenetik. Kabulen arabera, Pakistango 58 soldadu eta Afganistango bederatzi hil dira borroketan; Islamabadek, ordea, bere 23 soldadu eta talibanen berrehun ekintzaile baino gehiago hil direla esan du. Horiek horrela, Pakistanek bi herrialdeen arteko muga ixtea erabaki du: 2.600 kilometro luze da.
Beraz, salgaiak daramatzaten ibilgailuak aurrera egin ezinda geratu dira mugaren bi aldeetan. Salgaiak eta elikagaiak nagusiki Pakistandik heltzen dira Afganistanera —ez du itsasorako sarbiderik—.
Bi herrialdeen arteko harremanak gaiztotu egin dira 2021eko abuztutik hona; hau da, AEBetako tropak Afganistandik atera, eta talibanak agintera itzuli zirenetik. Pakistango talibanei babesa eta laguntza militarra ematea leporatzen dio Islamabadek Kabuli; bigarrenak akusazio hori ukatu du.
Eta asteburuan gertatutakoaren inguruan, bi aldeek elkarri egozten diote erantzukizuna. Pakistango armadak atzo ohar batean jakinarazi zuenez, «probokatu gabeko erasoak» abiatu zituen Afganistanek larunbat gauean, eta horiei erantzun zien armadak. Kabulek beste ohar batean adierazi zuenez, Pakistanek ostiralean egindako eraso bati erantzun zioten. Bi aldeek ohartarazi dute erasoei erantzungo dietela etorkizunean ere.
