Palestinako hainbat miliziak indarrean zegoen su-etena amaitutzat eman dutela jakinarazi dute gaur. Bart Israelgo hegazkinek Hamaseko hiru kide hil dituzte bonbardaketetan, eta horrek behartu du palestinarren erabakia. Ismael Lubbad, Abdala Lubad eta Mohamed Eldaja dira hildakoak, eta, Israelen bertsioa gezurtatuz, Hamasek jakinarazi du ez zirela inolako atentaturik prestatzen ari. Auto batean zihoazela hil dituzte.
"Etsaiak suarekin jolasean ibili nahi badu, erre egingo da", esan du Abu Obeidak, Ezzedin al Qassan brigadetako bozeramaileak. Herri Erresistentziarako Batzarrak eta Palestinaren Askapenerako Fronte Demokratikoaren zati armatuak ere su-etenaren amaiera iragarri dute. "Palestinarren odola garesti ordaindu beharko dute, eta palestinarren amorrua jasateko prestatu beharko du Israelek", esan dute.
