Presidentetza bozak, egunik gabe

Burundiko presidentetza bozak ekainaren 26tik uztailaren 15era aldatu zituztenean, atzerapen gehiagorik ez zutela onartuko ohartarazi zuen gobernuak. Baina, bozetarako bost egunen faltan, berriro atzeratu behar izan dituzte. Oraingoz, ez dute zehaztu noiz aukeratuko duten presidentea. EAC Afrika Ekialdeko Komunitatearen eskariz atzeratu dituzte bozak bi aldietan. Bi asteko atzerapena eskatu du EACk, baina hori «ezinezkoa» dela erantzun dio Burundiko Gobernuak: presidenteak kargua abuztuaren 26an hartu behar duela-eta, legez gutxienez hilabete lehenago hautatuta egon behar dela.

Pierre Nkurunziza presidenteak hirugarren agintaldira aurkeztea erabaki ondotik sortu ziren liskarrak Burundin. Konstituzioak eta gerra zibilari (1993-2005) amaiera eman zioten Arushako akordioek bi agintaldiko muga zehazten dute. Apiriletik, hamarnaka lagun hil dituzte segurtasun indarrek, estatu kolpe saio bat ere izan zen, eta 100.000 herritar inguruk Burunditik ihes egin dute Ruanda, Tanzania eta Kongoko Errepublika Demokratikora, errepresio politikoaren beldur.