Minnesotako (AEB) bi politikari demokrata tirokatu dituzte gaur, Ameriketako Estatu Batuetako goizaldean: Melissa Hortman estatuko Asanblea Legegileko ordezkaria eta John Hoffman senataria. Hortman eta haren senarra hil egin dituzte; Hoffman eta haren emaztea, aldiz, bizirik daude, baina «zauri larriak» dituzte. Hortman demokratek Minnesotako Asanblea Legegilean zuten taldeko burua zen, eta estatuko ordezkarien ganberako presidentea izan zen 2019tik 2025era; Hoffman, berriz, 2012an hautatu zuten estatuko senatari izateko.
Bi politikariei modu berean egin die eraso tiratzaile batek: beren etxeko atarian zeudela. Herrialdeko iturri ofizialek jakinarazi dutenez, gainera, erasotzaileak polizia baten uniformea zuen jantzia; informazio horren arabera, estrategia hori baliatu du biktimengana gerturatu eta tiro egiteko. Poliziako iturriak aipatuz The Washington Post egunkariak kaleratu duenez, Poliziak dokumentu bat aurkitu du ustezko erasotzailearen ibilgailuan; testu horretan Hortmanen eta Hoffmanen izenak aipatzen ziren.
Minnesotako gobernadore Tim Walzek eman du gertatutakoaren berri, urgentziaz antolatutako prentsaurreko baten bidez, eta erasoek «motibazio politikoak» dituztela ohartarazi du. «Gure demokraziaren oinarria eztabaida baketsua da. Ez ditugu gure arteko desberdintasunak indarkeriaren edo pistola baten bidez konpontzen», gehitu du.
AEBetako presidente Donald Trumpek ere erasoa gaitzetsi du, sare sozialen bidez: «Gisa honetako indarkeria basatiak ez dauka lekurik AEBetan». Etxe Zuriko maizterrak jakinarazi du Polizia lanean ari dela zer gertatu den argitzeko, eta erasoan zerikusia izan duten guztiak «zigortuko» dituztela.
