Washingtonek gerra amaitzeko proposamena egin dio Irani asteon, baina Teheranek atzera bota du, «zentzugabea» delakoan. Pakistanek bitartekari lanetan jarraitzen duen bitartean, erantzuna eman du Donald Trumpek, gaur goizaldean. AEBetako presidentearen esanetan, Iranek «bake itun bat egin nahi du», baina jendaurrean ukatu egiten du, «beldur baita herritarrek buruzagiak hilko dituztela». Alde bietako erasoek eta kontraerasoek ez dute etenik izan goizaldean.
«Herritarrek hilko dituzten beldur dira, baita guk hilko ditugun beldur ere». AEBetako presidentearen hitzak dira; goizaldean esan ditu, Errepublikanoen Batzorde Nazionalak urtero Washingtonen egiten duen afarian. Aurrez, Abbas Araghtxi Irango Atzerri ministroak hitz egin zuen, eta adierazi bitartekarien bidez Washingtonekin hitz egiteak ez duela esan nahi Iran AEBekin negoziatzen ari denik.
Hamabost puntuko plan bat ondu du Washingtonek Ekialde Hurbileko gerra «amaitu» dadin —AEBek ez dute jendaurrean erakutsi dokumentua, baina hainbat hedabidek filtratu dute—, eta, besteak beste, arma nuklearrak debekatzea eta «erregimena nabarmen aldatzea» exijitzen du hartan. Iranek, berriz, bestelako eskakizunak egin ditu: AEBek eta Israelek erasoak egiteari uztea, herrialdean hondatu dituzten azpiegiturak konpontzea, eta Iranek Ormuzko itsasartean daukan subiranotasuna aitortzea, besteak beste.
Bestalde, Txinako Atzerri ministro Wang Yik adierazi du bakea lortzeko «itxaropen izpi bat» sortu dela Ekialde Hurbileko gerran. Turkiako eta Egiptoko bere homologoekin mintzatu da telefonoz, eta esan du dei horietan hitz egin dutenaren arabera Teheranek eta Washingtonek «negoziatzeko asmoa» erakutsi dutela.
Azken orduetako erasoei dagokienez, Israelgo armadak goizaldean jakinarazi du Irango azpiegituren aurka abiatutako «eskala handiko» eraso olde bat amaitu duela. Telegram bidez egin du jakinarazpena, eta zehaztu «Irango izuaren erregimenarenak» direla azpiegitura horiek. Besteak beste, Isfahan aipatu dute oharrean. Eremu hori oso garrantzitsua da Iranentzat, eta hango azpiegitura energetikoarentzat eta militarrarentzat. Izan ere, uranioa aberasteko instalazio bat dago han. Azken hiruzpalau asteetan, Israelek hainbatetan izan du jomuga gune hori. Hala ere, Tel Avivek ez du zehaztu zenbaterainoko kalteak eragin dituen gaurko erasoarekin.
Irekia duen beste frontean, Libanon, gutxienez bost pertsona hil ditu Israelek, eta beste hemeretzi zauritu, hainbat erasotan, Libanoko iturri ofizialek jakinarazi dutenez. Libanoko Hezbollah milizia xiitak kontraerasora jo du, eta, jakinarazi duenez, dozenaka operazio abiatu Israel iparraldean, Israelgo armada, logistika baseak eta kokalekuak jomugan jarrita. Suziriak, artilleria eta droneak erabili dituztela zehaztu dute, eta Israelgo armadaren bi tanke jo dituztela.
Iranek, berriz, Israelen egin du eraso; erdigunea bonbardatu du, eta Kfar Qasim hirian hiru lagun zauritu, Arutz Sheva bertako hedabidearen arabera.
Abu Dhabin, berriz, bi lagun hil dira eta beste hiru zauritu, herrialdeko iturri ofizialek jakinarazi dutenez. Hango defentsa sistemek misil bat atzeman dute, baina misil horren hondakinen eraginez hil dira bi lagunak.
Bidesaria Ormuzen
Israelek gaur goizean jakinarazi du Ormuzko itsasartea ixtearen Irango arduraduna hil duela. Bertako 12 hedabideak azaldu duenez, Irango Guardia Iraultzailearen armadako komandante Alireza Tangsiri Bandar Abass herrian hil dute. Tel Avivek ez du xehetasun gehiago eman, eta Iranek, berriz, ez du ohartarazpenik egin.
Bestalde, Irango Parlamentua lege bat prestatzen ari da Ormuzko itsasartetik igarotzen diren ontziei bidesari bat ezartzeko, haien «segurtasuna» bermatze aldera. «Lege proiektu bat nahi dugu, bai legez aitortuko duena Iranek subiranotasuna duela Ormuzko itsasartean, eta Iranen esku daudela haren jabetza eta ikuskapena, bai herrialdearentzat diru iturri bat sortuko duena», adierazi dio Mohamad Reza Rezaei Kotxi Irango Legebiltzarreko Gai Zibiletarako Batzordeko lehendakariak Tasnim albiste agentziari.
Albiste agentzia horrek zehaztu duenez, datorren astean dira lege proiektua ontzen amaitzekoak, eta horren ostean aurkeztuko dute parlamentuan.
Munduan kontsumitzen den petrolioaren %20 inguru igarotzen da Ormuzko itsasartetik, eta pasabide hori itxi izanak eragin zuzena izan du mundu zabalean. Teheranek atzo jakinarazi zuen Ormuzko itsasartean «seguru» nabigatzeko aukera izango dutela Iranen «etsai» ez diren ontziek. Alegia, haien kontrako edozein eraso egin edo babesten ez dutenek.
