Ez dute akordiorik lortu Ekialde Hurbilean. Joan den asteazkenean, Washingtonek gerra amaiarazteko proposamen bat aurkeztu zion Teherani, eta ordutik Irani presio egiten aritu dira AEBetako agintariak. Bada, erantzuna iritsi da, baina ez da Etxe Zuriak nahi zuena. «Ez zait gustatu haien gutuna. Ez da egokia. Ez zait gustatu erantzuna», adierazi dio Donald Trump AEBetako presidenteak Axios hedabideari. Iranek, ordea, uste du bere eskakizunak ez direla «gehiegizkoak». Tasnim Irango berri agentziak zabaldu duenez, Teheranek exijitu du, besteak beste, Ormuzko itsasartearen kontrola bere esku geratu behar dela eta Washingtonek bertan behera utzi behar dituela ezarritako zigor guztiak.
Adostasunik ez zegoela argi utzi zuen atzo gauean Trumpek: «Irakurri berri dut Iranek 'ordezkari' deitzen dien horiek emandako erantzuna. Ez zait gustatu. Erabat onartezina da!», idatzi zuen Truth Social bere sare sozialean. Halere, ez du xehetasun gehiagorik eman Iranek emandako erantzunaren inguruan.
Trumpi erantzun dio gaur Esmaeil Baghaei Irango Atzerri Ministerioko bozeramaileak, eta ziurtatu du beren eskakizunak ez direla «neurrigabeak». Baghaeik prentsaurreko batean adierazi du Teheranek emandako erantzuna «arrazoizkoa eta arduratsua» dela, eta irandarren eskubideak babestea dutela helburu. Horregatik, galdetu du ea «gehiegizkoa» den exijitzea Iranen aktiboak askatzeko edo Libanoko gerra amaitzeko.
Washingtonek orri bateko memorandum bat jarri zuen mahai gainean, gerra amaiarazteko eta auzi nuklearrari heltzeko «esparru bat» ezarri ahal izateko. Pakistan ari da bitartekari, eta Teheranek haren bidez helarazi die erantzuna AEBei. Tasnim berri agentziak horren inguruko hainbat xehetasun kaleratu ditu gaur goizaldean. Teheranek exijitu du Irani ezarritako zigorrak eta blokeo ekonomikoa bertan behera uzteko, eta petrolioa esportatzeko baimena emateko. AEBetako armadak blokeatuak ditu Irango portuak.
Gainera, Ormuzko itsasartearen administrazioa Teheranen esku utzi behar dela oroitarazi dute. Hori bai, AEBek hainbat «konpromiso» hartuko lituzketela ere jakinarazi dute, baina ez dute zehaztu horiek zein izango liratekeen. Izoztutako aktiboak askatzea eta Israelek Libanoren aurkako erasoak etetea ere eskakizunen artean ageri dira.
Programa nuklearra, «marra gorria»
Tasnimek ez du aipatu Irango programa nuklearraren ingurukorik. AEBetako hedabideek, berriz, kaleratu dute Iranek uko egin diola programa nuklearraren inguruan negoziatzeari. Horren harira, Trumpek atzo Truth Socialen idatzi zuen Iranek 47 urte daramatzala AEBekin eta munduko gainontzeko herrialdeekin «jolasean», «atzeratzen, atzeratzen eta atzeratzen»: «Gurekin ez da gehiago jolasean ibiliko».
Mike Waltz AEBek Nazio Batuen Erakundean duten enbaxadoreak jakinarazi du Trumpentzat «marra gorri bat» dela Iranek bertan behera uztea programa nuklearra.
