«Errusiak misil balistikoekin egin digu eraso beste behin eta, beste behin, gure aliatuek ez digute abisurik eman», idatzi du gaur goizean Volodimir Zelenski Ukrainako presidenteak sare sozialetan. Errusiako armadak hiru erasoaldi egin ditu gaur goizaldean Kieven; gutxienez pertsona bat hil du, eta beste zortzi zauritu. AEBak eta Ukraina tentsio betean dabiltza azken egunetan; Kievek Errusiaren aldera egitea leporatu dio Etxe Zuriari. «Ukrainari aireko defentsarako misilen bidalketak blokeatu dizkiote, eta Errusiari zigorrak arindu», salatu du gaur Zelenskik.
Iragan astean iragarri zuen Donald Trump AEBetako presidenteak Errusiari zigorrak arinduko zizkiola; horrela, Moskuk diesela esportatu ahal izango du, eta, Trumpen arabera, erregaien prezioak merkatuko dira. Gainera, bart Marco Rubio AEBetako Estatu idazkariak ziurtatu zuen 60 egunez blokeatu dituztela Errusiari ezarri behar zizkioten zigor berriak. Azken egunetan, tentsioa areagotu da AEBen eta Ukrainaren artean. Izan ere, Kievek salatu du AEBak oztopatzen ari direla Ukrainako armadak erabiltzen duen satelite bidezko sistema, eta, gainera, adierazi du aireko defentsarako misilak ez dizkietela bidaltzen.
Duela astebete pasa, Trumpek iragarri zuen azpiegitura energetikoen aurkako erasoak etengo zituztela Ukrainak eta Errusiak. Ez alde batek eta ez besteak, ordea, ez zuten menia hori berretsi, eta elkarri eraso egiten jarraitu dute. Atzo, esaterako, Ukrainako armadak San Petersburgoko petrolio findegi bat jo zuen, eta sute bat eragin. Kremlinek «gerra amaitu nahi ez izatea» Leporatu zion Kievi.
Gaur, bestalde, Mosku izan da Kiev bonbardatu duena. Eta energia azpiegiturak ere izan ditu jomugan. Zelenskik jakinarazi duenez, gisa horretako erasoak egin dituzte, besteak beste, Vinnitsia, Volin, Kirovohrad, Mikolaiv, Zhitomir, Khmelnitski, Kharkiv, Ternopil, Odesa, eta Rivne eskualdeetan.
