Bigarren egunez jarraian, Krimeako anexioaren ikurretako bat bonbardatu du Ukrainak. Droneak baliatuta aire eraso bat egin du goizaldean Krimeako penintsula eta Errusia hegoaldea lotzen dituen Kertxeko zubiaren kontra. Errusiak esan du azpiegiturak kalteak eragin dituela, eta gobernuak bilera batera deitu du egoerari erantzuteko. Autoritateek trafikoa itxi behar izan dute; erasoaldiak, bide batez, bi pertsona hil ditu, Krimeako iturri ofizialek jakinarazi dutenez.
Atzo ere azpiegitura horri eraso egin zion Ukrainak droneekin, eta arkuetako bat kaltetu zuten. Trafikoa eten zuten agintariek, baina ordu batzuk geroago berrezarri zuten. Gaurko erasoaren ondorioz, ordea, ehunka metroko zati bat itsasora erori da. Hori kaleratu dute hainbat hedabidek, Ukrainako iturriak aipatuz. Volodimir Zelenski Ukrainako presidenteak erasoa txalotu du sare sozialetan.Â
Europako zubi luzeena da Kertxekoa. 19 kilometro ditu, eta Azoveko itsasoren eta Itsaso Bel tzaren artean dago, Kertxeko itsasartean. Kremlinek 2014an gauzatutako anexioaren sinboloetako bat da, eta Vladimir Putin Errusiako presidenteak berak inauguratu zuen 2018ko maiatzean.
2022ko otsailean Errusiak Ukrainako inbasioa hasi zuenetik, Kiev behin baino gehiagotan ahalegindu izan da azpiegitura horri eraso egiten, eta 2022ko urrian, esaterako leherketa batek zubiaren zati bat hondatu zuen. Errusiarentzat Krimea jotzea da zeharkatu ezinezko marra gorrietako bat, eta esan izan du penintsularen kontrako erasoak gertatuz gero ez lukeela zalantzarik edukiko erantzuteko orduan.
Moskuko iturri ofizialek adierazi dutenez, Ukrainak gaur goizaldean Errusiaren aurka egindako eraso ahalegina azken urteetako handiena da. Izan ere, Defentsa Ministerioak emandako datuen arabera, Ukrainak jaurtitako 1.440 drone erorarazi dituzte Errusiako 22 probintziatan; 1.335 izan ziren atzo. Â
Iturri ofizialek esan dute drone batzuek instalazio petrokimiko bat jo dutela Bashkiria probintzian, Kazakhstan iparraldean, baina ez dutela kalte larririk eragin.
Kertxeko zubiari egindako erasoaren ondorioz, ordea, trafikoa itxi dute, eta garraiolariak transbordadoreetan ari dira zeharkatzen itsasartea. Zubiak lau bide ditu ibilgailuentzako —bi noranzko bakoitzean—, eta bi trenbide, noranzko bakoitzeko bat.