Etiopiako 154 migrante zeramatzan ontzi bat hondoratu da Yemengo kostaldean, eta soilik hamabi pertsona atera dira bizirik. 68 migrante hilik topatu dituzte Adengo Golkoan, eta beste 74 desagertuta daude oraindik. IOM Nazioarteko Migrazio Erakundeak eman du ezbeharraren berri, eta jakinarazi du hiltzat eman dituztela desagertutako guztiak.
Atzo goizaldean gertatu zen istripua, Yemen hegoaldeko Abyan probintziatik hurbil. Probintzia horretako agintarien arabera, erreskate operazio «handi» bat jarri dute martxan; eta, zabaldu duten oharrean jakinarazi dutenez, gorpu asko topatu dituzte itsasoan barreiatuta.
Afrika ekialdetik eta Afrikako Adarretik Persiar golkoko herrialdeetara joateko migrazio biderik ohikoena Yemendik barrena doa. Gerratik edo pobreziatik ihesi, migranteek Itsaso Gorria edo Adengo golkoa zeharkatzen dituzte, Yemenen barrena golkoko herrialdeetara lan egitera joateko. Azken hilabeteetan, ehunka migrante hil dira ibilbide horretan; esaterako, martxoan, lau ontzi hondoratu ziren, eta ia berrehun pertsona desagertu.
IOMen arabera, iaz, 60.000 migrante baino gehiago iritsi ziren Yemenera. 2023an baino gutxiago: 97.200 izan ziren orduan.
