Saudi Arabia buru duen aliantza militarrak erasoaldi bat egin du gaur Yemengo Sana hiriburuan, eta bertako milizia xiitak jakinarazi duenez, gutxienez 27 lagun hil dira, eta beste 30 inguru zauritu. Huthien arabera, hildako guztiak zibilak dira, eta ez dute baztertu datozen orduetan biktima gehiago izatea, hondakinen azpian pertsona gehiago egon daitezkeen susmoa baitaukate.
Mohamed Abdulsalam milizia xiitaren bozeramaileak X sare sozialean daukan kontuan idatzi du, Saudi Arabiak «zibilei eraso egiten» jarraitzen duela, batez ere «merkatuetan eta herrixketan». Gaurko erasoaldia Al Xariya eskualdean egin dute, Bani Haxix barrutian, eta matxino huthien hitzetan, zibilak bizi ziren bost eraikin suntsitu dituzte.
Abdulsalamek beste mezu batean idatzi du erasoak «anbulantziak eta defentsa zibileko taldeak» ere izan dituela jomuga, «erreskate eta lehen sorospenarekin lotutako lanak egiten zituzten bitartean». Hala ere, ez Saudi Arabiak eta ez nazioartearen onespena daukan Yemengo Gobernuak ez dute erasoa bere gain hartu. Eta ez dute horren gaineko adierazpenik egin.
Azken egunetan izan dira eraso gehiago ere Yemenen. Atzo beste 30 lagun hil zituzten Yemengo Taiz probintziako merkatu baten aurka egindako bonbardaketa batean. Merkatu hori enfrentamenduak izaten ari diren eremutik gertu dago, eta, oraingoz, ez dute argitu nor dagoen erasoaldiaren atzean. Huthiek Riad buru duen koalizio militarrari egotzi diote erasoaldia. Yemengo Gobernuak, berriz, adierazi zuen xiitek egin zutela eraso hori.
Yemengo Gobernuak ostegunean ohar baten bidez adierazi zuenez, 40.761 operazio militar egin ditu euren erasoaldiak hilabete bete duen honetan, eta, guztira, 20.000 matxino xiita «neutralizatu» ditu. Gainera, ohartarazi zuen lehen hilabete honetan egindakoa «hasiera» besterik ez dela, eta datozen egunetan erasoaldiak areagotu egingo direla: «Huthiek porrot egin arte eta Yemengo erakundeak berrezarri arte erasoaldiarekin jarraituko dugu». Ohar hori argitaratu eta hurrengo bi egunetan ia 60 lagun hil dituzte.
Itsasartearen kontrola
Abuztuan lehertu zen Yemengo matxino xiiten eta Saudi Arabiaren arteko gatazka, eta, geroztik, okerrera besterik ez du egin. NBE Nazio Batuen Erakundearen azken datuen arabera, dagoeneko 1.700 lagundik gora hil dituzte dagoeneko.
Irailean gogortu egin zen egoera. Yemengo huthiek gune zabalak kontrolpean hartu zituzten mendebaldean, eta Bab el-Mandeb itsasartea itxi zuten. Handik igarotzen da nazioarteko itsas merkataritzaren %12 inguru, eta geroz eta garrantzitsuagoa bilakatu da Iranek Ormuz itxi zuenetik.
Urriaren aurreneko astean, Yemengo Gobernuaren aldeko aliantza militarrak Yemengo egunsentia izeneko erasoaldia abiatu zuen, eta jakinarazi zuen pasabide horren kontrola berreskuratu zuela. Baina huthiek itsasartea zeharkatzen duten ontziei eraso egiteko ahalmena daukate. Hortaz, kontrol hori ez da erabatekoa.
Hala ere, erasoaldi horrek indarrean darrai, eta zera da aliantza militarraren helburua: huthien kontrolpean dauden eremuak berreskuratzea eta Sana hiriburua askatzea. 2014ko irailetik milizia huthien kontrolpean dago hiriburua. Xiitak dira horiek. Aldiz, nagusiki sunita da haien etsai nagusia, Saudi Arabia; baita nazioartearen babesa duen Yemengo Gobernuaren ordezkari gehienak ere.
Hasiera batean, Yemengo Gobernuak adierazi zuen Dhubab hiriaren eta Bab el-Mandeb itsasartearen inguruan dauden «lurrak, uharteak eta eremu estrategikoak» berreskuratu zituztela. Horrez gain, atzo iragarri zuen 1.200 operazio inguru egingo zituztela askotariko gerra fronteetan huthien posizioen aurka, eta esan zuten dagoeneko beste hainbat hiri eremu askatu dituztela huthien eskuetatik. Baita Tavat Wathib eta Habil al-Saram mendixkak ere.
Hala ere, Al Jazeera hedabideak bertako iturriak aipatuz zabaldu du oraindik urruti daukatela Sana hiriburua berreskuratzeko aukera. Mendixkaz inguratuta dago Sana, eta horrek lana zailtzen dio aliantza militarrari, huthiek bertatik defendatzen baitute Yemengo hiriburua.
