Albistea entzun

Bira

Hendaian

Idurre Eskisabel -

2013ko otsailak 2

Zutabe honen haria izan zitekeen nola kokatu Patrick Dallennes Baionako suprefet berriak Hendaiakoaren aitzakian ikastolen aurka hartutako erabakia. Hau da, goi mailako funtzionario iritsiberri eta larderiatsu baten kolpe harroa den, ala suprefetaz gaindi Vallsen manupean Frantziako Estatuaren sakoneko urrats bat. Alegia, ikastolak diru publikoz laguntzeko debekuak ba ote duen loturarik Aurore Martinen Espainiaratzearekin eta gero eta mamituagoa ematen duen lurralde elkargoaren ukapenarekin. Azken batean, jakobinismo gotorrenaren erasoa ote den sustraitik erauzteko UMPtik ezker abertzalera islatu den herri izaera, Ipar Euskal Herria erakundetzeko irmo galde eginez.

Baina aurpegiak etortzen zaizkit burura. Adibidez,supermerkatuan, alaba frantses eskolara eramateko esanez euskara ederrean errieta egin didan aitonarena. Edo aita euskalduna duen arren «egun on!» entzunda martiztarra banintz bezala begiratzen didan 14 urteko auzoko nerabearena. Edo «ogi bat» aditu orduko gazteleraz erantzuten didan dendari euskaldunarena. Edo eskolako psikologoak gurasoei euskaraz ez egiteko agindu zienez —bestela ez ei zuen frantsesa ikasiko— egun bere hizkuntza galdu izanaz dolutzen den masajista gaztearena.

Guztiak izango ditut presente gaur, Hendaiako karriketan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.