Ipar Euskal Herriko udalerri orotan izanen dira hautagaiak

Eskuin muturreko Fronte Nazionala lehen aldiz aurkeztuko da Miarritzen; Baionan ez du osatu zerrenda
Jean Grenet Baionako auzapezak azken kontseilu bilera egin du.
Jean Grenet Baionako auzapezak azken kontseilu bilera egin du. GAIZKA IROZ

Aitor Renteria -

2014ko martxoak 7
Patrick Dallennes Baionako suprefetak martxoaren 23an eta 30ean herriko bozetan lehiatuko diren zerrendak onartu ditu ofizialki. Ipar Euskal Herriko 159 udalerrietan lortu dute, bederen, hautagai zerrenda bat aurkeztea. Bi falta ziren atzora arte: Bunuze (Nafarroa Beherea) eta Mendikota (Zuberoa); biok azken orduan aurkeztu dituzte zerrendak. Zailtasun handienak emazte-gizonen arteko parekotasun legea betetzeko atzeman dituzte. Suprefeturak egun jakinaraziko ditu ofizialki aurkezten diren hautagaien zerrendak, herriz herri.

Zerrendak aurkezteko epea atzo bukatu zen arren, hautagai nagusiak aspalditik ari dira kanpainan buru-belarri. Lehia hertsiak igurikatzen dira; bertzeak bertze, Baionan. Han, Henri Etxeto sozialistak eta Jean Rene Etxegarai zentristek dute herriko etxea hartzeko aukera handiena. Baina Sylvie Durrutik kartak nahasi ditu zerrenda bat aurkeztuz, UMPren irizpideak urratuz. Jean Claude Iriartek gidatzen duen Baiona 2014 zerrendaren emaitzak bigarren itzulirako gakoa ukan dezake; abertzale eta ezkertiarren erreferentzia izanen da Baionan. Jean Grenet Baionako auzapezak azken kontseilu bilera atzo egin zuen. Henri Grenetek auzapez kargua ukan zuen 1959tik 1995era, eta geroztik, haren seme Jeanek ukan du boterea.

Lehia hertsia ere Miarritzen Max Brisson UMP eta Michel Veunac zentristaren artean. Ezkerreko alderdiek gakoa ukan dezakete. EAJk Max Brisson sostengatzen du, eta Michel Veunacen zerrendan joanen dira, lehen itzulitik, gainerateko abertzaleak.

Herriko etxeen eskumen ugari herri elkargoen esku gelditu dira, eta, ondorioz, askoz ere botere handiagoa metatzen da herri elkargoetan. Hauteskunde sistemaren aldaketaren ondorioz, oposizioko alderdiek ordezkaritza lor dezakete herri elkargoetan. Sentsibilitate abertzaleko zerrendak emendatu dira, eta horrek eragin nabarmena ukan dezake horien kolore politikoan.

FNren zerrenda

Lehen aldiz aurkeztuko du zerrenda propioa Miarritzen (26.000 biztanle inguru) eskuin muturreko FN Fronte Nazionalak. Zerrendan aurkeztu ahal izateko, emazteak eskas zituen, baina azkenean lortu du, eta zalantza handia dago lor dezakeen emaitzaz. Baionan, berriz, ez du erdietsi zerrendarik osatzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna