Beldurrak umorea izango du lagun gaur Donostian

Donostiako Fantasiazko eta Beldurrezko Zinemaren Asteak lanen erdiak egin ditu jada. Lobos de Arga (Espainia, 2011) lana ikusi ahal izango da gaur, Antzoki Zaharrean, 17:00etan. Atzo aurkeztu zuten filma, eta han egon ziren Juan Martinez Moreno zuzendaria eta Gorka Otxoa eta Carlos Areces aktoreak. 80ko hamarkadako generoko zinemari omenaldia egiten dio lanak, eta beldurrezkoa bada ere, umore ukituak ere baditu.

Emanaldi eta emanaldi artean, film gehiago aurkezten jarraitzen dute. Xavier Gens zuzendari frantziarraren The Divide (AEB, 2001) lanaren txanda izango da gaur. New Yorken girotu du istorioa Gensek, hiriari eraso egiten dioten unean. Etor daitekeenetik babestu nahian, zortzi lagun sotogotortu batean ezkutatuko dira. Kanpoan gertatzen denaren berri izan gabe, bizirik irauteko borroka klaustrofobikoari aurre egin beharko diote. Bihar emango dute filma, Antzoki Zaharrean, 22:00etan. Herschell Gordon Lewisen 2000 Maniacs fanzinea ere (AEB, 1964) gaur aurkeztuko dute.