Eusko Jaurlaritza «kezkaturik» dago, eskumenik ez delako iristen

Erkorekak esan duenez, «ahaleginak areagotzeko» eskatu dio Urkulluk Sanchezi
Urkullu eta Sanchez joan den martxoan, Donostian.
Urkullu eta Sanchez joan den martxoan, Donostian. JON URBE / FOKU

Gotzon Hermosilla -

2019ko apirilak 3
Espainiako Gobernuak Eusko Jaurlaritzari emandako egutegia, eskualdatu gabe dauden eskumenen ingurukoa, praktikan ezerezean gelditu zen Espainiako Kongresurako eta Senaturako hauteskundeak aurreratu zituzte- nean. Egutegi horren arabera, eskumenen lehen multzoa —zazpi, orotara— martxoan eskualdatzea aurreikusten zuten, baina begien bistakoa zen hauteskundeak apirilaren 28ra aurreratuta zaila izango zela epe horiei eustea. Orain, Jaurlaritzak «kezka» agertu du, ikusten duelako denbora pasatzen ari dela eta eskumenak ez direla iristen.

Jaurlaritzako bozeramaile Josu Erkorekak esan du Iñigo Urkullu lehendakaria «harremanetan» dagoela Pedro Sanchez Espainiako gobernuburuarekin, eta eskatu diola «ahaleginak handitu eta gehitzeko», eskumen multzo horren transferentzia apirilaren 28a baino lehenago gauza dadin.

«Kezka eta ezinegon horren berri ematen diegu Madrilgo gure mintzaideei aukera dugun bakoitzean», esan du Erkorekak, «eta ikusarazten diegu akordioak ez direla gauzatzen, kontu ekonomikoek blokeaturik dirautela, eta ez dela antzematen behar adinako bultzada politikorik oztopoak gainditu ahal izateko».

Erkorekak azaldu duenez, Espainiako Gobernuak ematen dion erantzuna izaten da «lanean» ari direla. Baina martxoa bukatu da, hauteskunde kanpaina datorren astean hasiko da, eta, oraingoz, ez dago transferentzien arrastorik.

Zortzi eskumen airean

Zortzi eskumenen inguruan ari dira negoziatzen Eusko Jaurlaritza eta Espainiako Gobernua: egutegiaren arabera, martxoan transferitu behar ziren zazpiak —botiken inguruko legeria, eskola asegurua, diru laguntzak enplegu erregulazioko espedienteek kalteturiko langileentzat, aldirietako trenbideak eta abar— eta AP-68 autobidearen zati bat.

Erkorekak salatu du zortzi eskumen horietatik bakar baten balorazio ekonomikoa helarazi diola Espainiako Gobernuak Jaurlaritzari: «Arlo juridikoan jarrerak hurbildu ditugu, baina arlo ekonomikoari ekin ere ez diote egin ia», esan du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna