Eusko Legebiltzarrerako hauteskundeak

Bozak aurreratzea kritikatu du oposizioak

EAJren «interesak» eta hainbat gairi buruz azalpenik ez ematea aipatu ditu oposizioak hauteskundeak aurreratzeko arrazoitzat. Zerrendak osatzeko prozesuak bizkortu beharko dituzte alderdiek
Maddalen Iriarte, atzo goizean eginiko prentsaurrekoan.
Maddalen Iriarte, atzo goizean eginiko prentsaurrekoan. LUIS TEJIDO / EFE Tamaina handiagoan ikusi

Iosu Alberdi -

2020ko otsailak 12

EH Bilduk eta Elkarrekin Podemosek gogor kritikatu dute Eusko Legebiltzarrerako hauteskundeak aurreratzeko Iñigo Urkullu lehendakariaren erabakia. EH Bilduko lehendakaritzarako hautagai Maddalen Iriartek «interes alderdikoi eta pertsonalak» ikusten ditu horren atzean, eta Urkulluren eta bere gobernuaren «kudeaketa penagarriaren erakusgarria» dela ziurtatu du. Elkarrekin Podemoseko bozeramaile Lander Martinezek uste du «kontuak ez emateko» deitu duela bozetara. EAJko EBB Euzkadi Buru Batzarrako presidente Andoni Ortuzarrek, ordea, erabakiaren alde egin du, erantzukizuna oposizioaren gain jarriz: «Ezin ditugu hilabeteak impasse batean alferrik galtzen utzi oposizioa gaur egun blokeo politiketan murgilduta dagoelako».

Iriarteren esanetan, ordea, «gustuko ez dituen gehiengoak» eragozteko aurreratu ditu bozak. EH Bilduko hautagaiak salatu du oraindik ere zortzi hilabeteko epea zegoela proiektu eta lege garrantzitsuak aurrera ateratzeko, baina Urkulluk horiek «blokeatzearen» aldeko hautua egin duela. Alokairuaren prezio maximoa, merkataritza guneen arauketa eta estatus politiko berriaren ingurukoa aipatu ditu EH Bilduko kideak. Hauteskundeak aurreratzearen harira Jaurlaritzak egin duen «kanpaina mediatiko deitoragarria» ere kritikatu du Iriartek. Izan ere, aurreko asteartean hasi ziren aurrerapen baten inguruko zurrumurruak.

Martinezek ere onartu gabe geratu diren legeetan jarri du arreta. Elkarrekin Podemoseko bozeramaileak azaldu du «Euskadirentzako funtsezko diren» zortzi legetan akordioak egiteko proposamena egin ziotela Urkulluri, hauteskundeen deia egin aurretik. Kritikatu du Eusko Jaurlaritzak «aurrera ihes egiteko» hautua egin duela, proposamenari entzungor eginez: besteak beste, Zaldibarko hondakindegiko ezbeharraren inguruko azalpenak eman behar ez izateko. Horregatik, benetako arrazoien inguruko «azalpen sakonagoak» eskatu dizkio lehendakariari.

PPren lehendakarigai Alfonso Alonsok Kataluniari egin dio erreferentzia. Esan du EAJk hauteskundeak aurreratu dituela Kataluniako egoera «ez kutsatzeko». «Euskal gizarteak ez dio bide horri jarraitu nahi», erantsi du.

Barne prozesuak bizkortuz

Apirilaren 5eko data zehaztuta, hauteskunde zerrendak osatzeko eguna ere hala dago: martxoaren 2a izango dute alderdiek horretarako epemuga. EAJk bizkortu egin du hautagai zerrendak osatzeko prozesua. Otsailaren 24an egingo du behin betiko zerrendak onetsiko dituen Aberri Batzarra. Aurretik, zerrendak osatzeko hautagaiak aukeratu beharko dituzte. Horretarako, bigarren bozketa atzo hasi zen, eta otsailaren 20an amaituko da. Gero, 21ean eta 22an bilduko dira herrialdeetako batzarrak. Halere, ustekaberik ezean, Iñigo Urkullu eta Bakartxo Tejeria izango dira lehendakaritzarako eta Eusko Legebiltzarreko presidentetzarako hautagaiak, haiek soilik aurkeztu baitira.

Iriartek adierazi du EH Bildu hauteskundeak ekainean edo urrian egiteko prestatzen ari zela, baina jada «oso aurreratuta» daukatela zerrenden osaera. Azken zerrendak martxoaren 6a eta 8a bitartean aurkezteko asmoa zuen koalizioak. Aurrerapenarekin, ordea, epeak moldatu beharko dituzte. Koalizioak zehaztua du Iriarte bera izango dela lehendakarigaia.

PSE-EEk Idoia Mendia aurkeztuko du lehendakarigai, eta PPk, Alfonso Alonso. Hamar egunekan, koalizioa osatu nahi du Ciudadanosekin eta «ilusioa galdua duten sozialistekin».

Elkarrekin Podemosen hautagaia, berriz, argitzeko dago oraindik. Rosa Martinez eta Miren Gorrotxategi aurkeztu dira horretarako. Lehenak Lander Martinezek zuzendutako ildoaren babesa du. Bigarrenak, Madrilgo zuzendaritzarena. Horiek ere barne prozesuan aldaketak egin beharko dituzte, otsailaren 23tik martxoaren 1era kanpaina egiteko tartea ezarria baitzuten, hilaren 4an lehendakarigaia izendatzeko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ezkerretik eskuinera, Inma Moro, Itziar Llanera eta Begoña Olaskoaga, Arrondegiko osasun etxean. ©LUIS JAUREGIALTZO / FOKU

Aztarnariak zaintzaile

Maite Asensio Lozano

Koronabirusean positibo eman dutenen gertuko kontaktuak bilatzea baino gehiago da aztarnari sistemako kideen lana: gaitzari eta bakartzeari buruzko informazioa emateaz edota zailtasunak dituztenen jarraipena egiteaz ere arduratzen dira.

PCR proba bat, Donostian. ©Idoia Zabaleta, FOKU

Beste 855 positibo atzeman dituzte Hegoaldean

Uxue Rey Gorraiz

Inoiz baino PCR proba gehiago egin dituzte azken egunean: 14.298, zehazki. Horietatik 855 kasutan detektatu dute birusa. 337 Nafarroan detektatu dituzte. Aurreko egunean, laurehunetik gora izan ziren lurralde horretan, lehenbiziko aldiz.

Miren Basaras, EHUko COVID-19aren Zaintza Batzordeko arduraduna. ©EHU

EHUk Miren Basaras izendatu du COVID-19aren Zaintza Batzordearen arduradun

Mikel O. Iribar

Mikrobiologoa eta EHUko irakaslea da Basaras, eta koronabirusaren ikerkuntzan badu esperientziarik. Zaintza Batzordearen lehen erronka EHUko egoera epidemiologikoa zein den aztertzea izango da. 

Moto gidari bat gaur goizean, herritik ateratzeko kontrolean. / ©Idoia Zabaleta, Foku

Sarbideak itxita eta kaleak hutsik Azkoienen

Berria

Normaltasuna izan da nagusi konfinamenduaren lehen orduetan. Herritik irten diren ia denak lan arrazoiengatik irten direa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna