Eskolen kulturan berdintasuna txertatu nahi du Jaurlaritzak

Uriartek hezkidetzako bigarren plana aurkeztu du legebiltzarrean. Irakasleei ez ezik, ikasleen familiei ere trebakuntza emango diete

Maite Asensio Lozano -

2019ko ekainak 18
«Hezkuntza komunitatearen eguneroko bizitzan lan integrala eta integratua planteatu behar da, estamentu guztien lankidetzarekin». 2013an hezkidetzako lehen planarekin abiatutako bidea sendotu nahi du Eusko Jaurlaritzak bigarren planarekin. Ikastetxeetan berdintasunarekin lotutako egiturak sortzea eta oinarrizko trebakuntza ematea jarri zuen helburu nagusi lehen plan hark, eta, ebaluazioaren arabera, zentroen %87k izendatu dute hezkidetza arduradun bat, eta irakasleen %60k jaso dute hamar orduko formakuntza modulua. Ildo horretan jarraitzeaz gain, ikastetxeen kulturan eragin nahi du orain gobernuak: genero ikuspegia eguneroko jardunean txertatu, bai zeharka, curriculumetan edota dokumentazioan, bai berariaz, hezkidetza proiektuen bidez.

Cristina Uriarte Hezkuntza sailburua Eusko Legebiltzarrean izan zen atzo, bigarren planaren xehetasunen berri ematen. «Sexismoaren molde guztiak gainditzea» jarri zuen helburu. Eta lehentasunen artean, indarkeria matxista prebenitzeko eta garaiz antzemateko tresnak abian jartzea. Nahiz eta zentro askok xede hori jaso duten euren prestakuntza proiektuetan, bigarren planak berak nabarmendu du «oraindik asko» dagoela egiteko; besteak beste, biktimak «laguntzea» aipatu du.

Bortizkeriari kontra egiteko zein berdintasunean aurrerapausoak emateko, ezinbestekotzat jo dute «prestakuntza ibilbideak eskaintzea». Langileei orain arte emandako trebakuntza familietara ere hedatu nahi dute, hezkuntza komunitate osoak formakuntza izango duela bermatzeko. Ikastetxeetan sortu diren ardurak eta egiturak koordinatzeko premia ere nabarmendu dute.

Inklusio plana, martxan

Eskola inklusiboa garatzeko lehen plana ere mintzagai izan du Uriartek parlamentuan. Batetik, «bizikidetza positiboa» du xede planak, eta, bestetik, ikasleen egoera sozialak, ekonomikoak edo erlijiosoak eragin ditzaketen oztopoak gainditzea; ikasteko zailtasunak garaiz antzematea azpimarratu dute. Finean, sailburuaren arabera, bi planen helburua da «ikasleak bizitzarako heztea».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna