«Gaur, [atzo] ilusio berarekin eusten diot lehen eguneko konpromisoari: apaltasunez eta erabakitasunez lan egingo dut Euskadi aurrerakoi baten alde, bakean eta askatasunean, berez Europan eta gainerako munduan». Iñigo Urkulluk hitz horiekin gogoratu du atzo bete zela hamarkada bat Eusko Jaurlaritzako lehendakari karguaren zina egin zuenetik. Efemeridea «une egokia» begitandu zitzaion Urkulluri eskerrak emateko: «Eskerrak eman nahi dizkiet euskal herritarrei, erakundeei, alderdi politikoei, langile publikoei eta sektore pribatukoei, enpresa eta elkarte sareei, hirugarren sektore sozialari, hezkuntza eta kultura munduari».
Gaur egungoa «gizarte inklusiboagoa, solidarioagoa eta berritzaileagoa» dela nabarmendu du Urkulluk, eta «hobeto prestatuta» dagoela: «Bizikidetza gehiago finkatu da, eta ezberdinen arteko akordioak eta erakundeen egonkortasuna gure nortasunaren ikur bilakatu dira». Areago, «zerbitzu publiko sendoagoak» daudela gaineratu zuen, eta «ekimen publikoaren eta pribatuaren arteko lankidetza» dutela «eredu».
Eusko Legebiltzarrak 2012ko abenduaren 13an hautatu zuen Urkullu Jaurlaritzako lehendakari. EAJk gutxiengoan osatu zuen gobernua orduan, eta, 2016an berriro hauteskundeak irabazi ondoren, EAJren eta PSE-EEren arteko koalizio gobernuaren buru izan zen Urkullu. 2020an, Urkullu hirugarrenez aukeratu zuten lehendakari, EAJk eta PSE-EEk gehiengo osoa eskuratu ondoren.
Urkulluk hamar urte bete ditu lehendakari gisa, «lehen eguneko ilusio beraz»
Efemeridea oroitzeko mezu batean, Eusko Jaurlaritzako lehendakariak eskerrak eman dizkie herritarrei, erakundeei eta alderdiei, besteak beste
Iruzkinak
Ez dago iruzkinik
Ordenatu
