Indarkeria matxistaren biktimak babesteko protokoloa gogortu dute

Ertzaintzak gogortu egin du urruntze aginduak betetzen ez dituztenen aurkako protokoloa Araban, indarkeria matxistarekin lotura duten kasuetarako. Hemendik aurrera, ertzainek atxilotu egingo dituzte agindua betetzen ez dutenak, nahiz eta biktimak urratzeko baimena eman.

Maialen Mazonen hilketagatik eguneratu dute protokoloa. 32 urteko gasteiztarra haurdun zegoen, eta domekan aurkitu zuten, Gasteizko apartamentu hotel batean, ondoan 3 urteko haurra zeukala. Izan ere, haren bikotekideak, ustezko hiltzaileak, urratu egin zuen biktimarengandik urruti egotera derrigortzen zuen agindua.

EFE berri agentziaren arabera, Bizkaian eta Gipuzkoan lehendik martxan zegoen protokolo hori, eta Gasteizko udaltzainek ere hala jarduten zuten. Ertzaintzak urtarriletik zekien herenegun Gasteizen 32 urteko emakumea ustez hil zuen gizonezkoa urruntze agindua urratzen ari zela, eta Herrialde Katalanetako epaitegi batek «muturreko arriskuko» babesa ezarria ziola biktimari. Gizonak salaketa bi zeuzkan Castellon (Herrialde Katalanak) eta beste bat Torremolinosen (Espainia) bikotekidearen kontrako indarkeria matxistagatik.

Isilunea Legebiltzarrean

Josu Erkoreka Segurtasun sailburuak astelehenean adierazi zuen Ertzaintzak birritan egin zuela berba andrearekin: urtarrilean eta hilketa baino hamar egun arinago. Erkorekaren arabera, biktimak poliziei adierazi zien ez zuela bere burua «arriskuan» ikusten eta bikotekideari baimena eman ziola agindua ez betetzeko.

Bilgune Feministak onartezin iritzi zien «biktimizazioa erreproduzitzen» duten ikuspegi «misoginoei», baita errua andrazkoen gain jartzen duten «esku garbiketei» ere. Familiak «hiltzaileaz bestelako errudunik ez bilatzeko» eskatu zuen asteartean, komunikatu baten bidez. Helarazitako babesa eskertu zien herritarrei eta instituzioei, baina «errespetua» eskatu zien hedabideei, eta hilketaren kasuari trataera egokia ematea galdegin.

Ustezko hiltzailea domekan bertan atxilotu zuten, Zaragozan (Espainia). 34 urteko gizonezko bat da. Espainiako Auzitegi Gorenak 2008an ebatzi zuen emakumearen baimenak ez duela eragozten arau hauslea zigortzea, Zigor Kodearen 468. artikuluak aurreikusten duenez.

Eusko Legebiltzarrak hilketa gaitzetsi zuen atzo, eta legebiltzarkideek minutu bateko isilunea egin zuten. Bakartxo Tejeria legebiltzarreko lehendakariak irakurri zuen adierazpena, eta dolumina agertu zien biktimaren senideei eta hurrekoei. Herritarrei eskatu zien «konpromiso pertsonal eta kolektiboak» hartzeko berdintasunaren alde. Oharrak erakundeen zeregina ere azpimarratu zuen, «sexu indarkeria erauzteko erantzukizuna» dutelako, eta erakundeei eskatu zien horretarako plan integralak garatzeko, horiek «emakumeen aurkako indarkeria behin betiko desagerrarazteko behar diren baliabideez hornituta».

Aurtengo bigarren hilketa matxista da Euskal Herrian, eta biak aste biren bueltan gertatu dira. 2003tik, 119 andre hil dira Euskal Herrian indarkeria matxistaren ondorioz, eta 11 haur.