Asiron EH Bilduren alkategai

Iruñeko alkatea izango da zerrendaburua. Bilbon eta Bizkaian, bina hautagai aurkeztu dira
Joseba Asironen hautagaitzaren aurkezpen ekitaldia, atzo.
Joseba Asironen hautagaitzaren aurkezpen ekitaldia, atzo. IÑIGO URIZ / FOKU

Jon O. Urain -

2018ko ekainak 2
Joseba Asiron izango da berriro ere EH Bilduren hautagaia Iruñeko alkatetzarako. Datorren urteko udal eta foru hauteskundeei begira, zerrendaburuak aukeratzeko prozesuan dago koalizio subiranista, eta, Nafarroako hiriburuko alkatetzarako, Asironena izan da barne prozesuan aurkeztutako hautagaitza bakarra. Indar politikoaren esanetan, Iruñeko Mahai Politikoaren eta EH Bilduko oinarrien babesa du Asironek, «udal talde osoak Iruñean aldaketaren alde azaldutako konpromisoagatik eta eginiko lanagatik».

Atzo aurkeztu zuten hautagaitza, eta prentsaren aurrean hitz egin zuen Asironek berak. Nabarmendu zuen «luxu eta plazer handia» dela alkate izatea, eta eskerrak eman zizkien «kalean lanean» aritutakoei; baita EH Bilduri ere, «duela hiru urte emandako konfiantza berritzeagatik».

2015eko maiatzeko bozen ondorioz eskuratu zuen alkatetza Asironek, udal bozetan bigarren indarra izan zen, UPNren atzetik, baina beste talde batzuek Asiron babestu zuten. Hiru urte karguan eginda, uste du oraindik ere «erronka garrantzitsu bat» duela aurretik: «Aldaketa sendotzen jarraitzea». Ildo horretan, konpromisoa azaldu zuen «ilusio, indar, seriotasun, profesionaltasun eta zintzotasun berarekin» lanean jarraitzeko: «Pertsonalki, ez dut Iruñearen alde lan egitea ez den anbiziorik».

Hiru urteotako lanaren balantzea ere egin zuen: «Gogor ikasteko urteak izan dira, lan handikoak, baina inoiz ez dugu aldaketan konfiantza galdu». Orain, Iruñea «berdeagoa, iraunkorragoa, bidezkoagoa, sozialagoa, solidarioagoa eta, noski, feministagoa» dela uste du, eta «memoria historikoaren eta berdintasunaren aldeko borroka» jo zituen mugarritzat.

EH Bilduk jakinaraziak ditu jada Arabako eta Gipuzkoako ahaldungai nagusiak —Kike Pinedo eta Juan Karlos Izagirre—, Nafarroako Gobernuko lehendakarigaia —Bakartxo Ruiz— eta Donostiako, Gasteizko eta Iruñeko alkategaiak —Reyes Karrere, Miren Larrion eta Asiron bera—. Beraz, Bizkaiko eta Bilboko zerrendaburua zehaztea falta zaio.

Goirizelaia edo Markoartu

Bizkaiko ahaldungai nagusi izateko, bi hautagai aurkeztu dira: Arantza Urkaregi eta Beatriz Ilardia. Urkaregi Bizkaiko Batzar Nagusietako batzarkidea da gaur egun, eta Ilardia, berriz, Galdakaoko zinegotzia. Bilboko zerrendaburu izateko ere bi izango dira EH Bilduren hautagaiak: Jone Goirizelaia eta Joana Markoartu. Goirizelaia legebiltzarkidea da, eta Markoartu, administraria Gasteizko Udalean.

Hautagaiek kanpaina egiteko aukera izango dute datorren astelehenetik ostegunera bitartean, eta koalizioko kideek ekainaren 8tik 10erako epea izango dute botoa emateko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna