Kilometroak jaiak 'Euskaldunon Egunkaria'-ren itxiera oroituko du

Eredu berriari jarraikiz, aurten urte osoko festa izango da Kilometroak. Orereta ikastolak antolatuko du, eta atzo aurkeztu zituzten egitarauaren zutabe nagusiak Errenterian (Gipuzkoa). Babes zabala jaso zuen deialdiak: bertan izan ziren, besteak beste, BERRIAko eta Euskaldunon Egunkaria-ko ordezkariak, Euskalgintzaren Kontseiluko idazkari nagusi Idurre Eskisabel eta Errenteriako Udaleko kideak. Urriaren 1ean izango da Gipuzkoako ikastolen jai nagusia, baina aurretik bi mugarri izango ditu egitarauak: Egunkaria-ren itxiera oroitzeko, ekitaldi sorta otsailaren 20tik 24ra, eta, euskara batuaren sustatzaileak omentzeko, giza katea martxoaren 24an.

Itziar Navarro Orereta ikastolako lehendakariak nabarmendu duenez, hiru zutoinen bueltan ardaztu dute egitaraua: eskertza, euskara eta euskal kultura egitasmoen erdi-erdian jartzea, eta komunitatea. Eskertzari lotuta, Egunkaria-ren itxiera eta herriaren erantzuna gogoratuko dituzte. Hogei urte beteko dira aurten Guardia Zibilak euskarazko egunkari bakarra itxi zuenetik.

Baina Kilometroak festaren harira, ez dute Euskaldunon Egunkaria soilik omenduko: Milimetroak: Batasunaren bidea antolatu dute Euskaltzaindiarekin elkarlanean, eta euskara batua sortzeko lan egin zuten zenbait izango dituzte gogoan. Izan ere, Orereta ikastolak 60 urte beteko ditu aurten, eta euskara batuaren oinarriak jartzeko Baionan «urrats erabakigarriak» egin zituztenetik ere sei hamarkada beteko dira. Martxoaren 24a aukeratu dute omenaldia egiteko. 8.000 laguneko giza kate batekin lotuko dituzte Errenteria eta Donostia. Gainera, Euskaltzaindiko zuzendaritza Errenteriako udaletxean bilduko da, eta ekitaldi instituzional bat ere egingo dute, «batasunaren bidean nabarmendutako» hamabost pertsonak omentzeko.

Ekitaldi sorta

Ekintza nagusiez gain, beste ekitaldi sorta bat ere atondu dute. Besteak beste, maiatzaren 6an, hamabi orduan oholtza bat eskainiko diete herriko sortzaileei; maiatzaren 19an eta 20an, Adaxka berriak ikuskizuna egingo dute; eta uztailean, kontzertu bat egingo dute Urmugaren barruan.

Erronka bat ere jarriko dute martxan: Euskararen errioa. Kilometro bat osatzeko adina euro bateko txanpon bildu nahi dituzte, eta Guinness liburuan sartu nahi dute. Kilometroak jaiaren bidez lortzen duten dirua erabiliko dute Errenterian herriko eragileekin euskara eta euskal kultura bultzatzeko proiektu bat abian jartzeko, Ipar Euskal Herriko eta Nafarroako ikastolekin martxan duten Zubiak Eraikiz egitasmorako, eta ikastolako Añabitarte baserria eta inguruak biziberritzeko.