Koronabirusa

Osasunbideko itxaron zerrendan, batez beste, bi asteko atzerapena

Pertsona bakoitzak 64 egun itxaron behar du kontsultara joateko. 7.200 pertsona daude ebakuntza kirurgiko baten zain. Nafarroako Gobernuak kopuruak murriztu nahi ditu
Bi osasun langile pertsona bati ebakuntza bat egiten, Iruñeko ospitalean, maiatzean.
Bi osasun langile pertsona bati ebakuntza bat egiten, Iruñeko ospitalean, maiatzean. MARISOL RAMIREZ / FOKU Tamaina handiagoan ikusi

Amaia Ramirez de Okariz Kortabarria -

2020ko irailak 16

Nafarroako Gobernuak Osasunbidearen egoera izan zuen hizpide atzo, eta Santos Indurain Osasun kontseilariak jakinarazi zuen lehen kontsultarako itxaron zerrendetan 43.802 pertsona daudela esperoan. Iazko datuekin alderatuz gero, batez beste bi asteko atzerapena dute zerrendek. Egun, pertsona bakoitzak, gutxi gorabehera, 64 egun itxaron beharko du kontsultara joateko. Hain zuzen, atzerapenik handienak 2014ko abenduan jaso ziren. 55.449 pertsona zeuden itxaron zerrendetan, eta atzerapena 81 egunekoa zen. Areago, Osasun kontseilariak gehitu zuen 7.200 pertsona daudela zerrendetan ebakuntza kirurgiko bat egiteko zain.

Izurriteak sortutako eragina izan zuen gogoan Indurainek: «Itxaron zerrendetako egoera, batez ere kontsultetakoa, ez da ona. Egoera arrunt batean onargarriak izango ez liratekeen datuak dira, eta badakigu hainbat pertsonarengan duela eragina». Haren arabera, izurriteak eragin «zuzena eta erabakigarria» izan du Nafarroako osasun sisteman. Hala ere, gaineratu zuen izurritearen «garairik okerrenetan» ere esku artean zituzten planek bermatu zutela bizi egoeretan eragina izan zezaketen kontsultak egotea eta atzeratu ezin zitezkeen ebakuntzak egitea. Osasun langileen lana ere goraipatu zuen: «Sistema egokitzeko egindako ahaleginez eta osasun langileek egindako lanaz hausnartzea merezi du, etengabe aritu baitira gauzak egiten eta berrantolatzen». Haren ustez, osasun sistema ez da gelditu, nahiz eta leku guztietara ezin iritsi ibili den.

Orain, pandemiaren aurreko kopuru berberetara itzultzeko ahalegina egingo dute, baina Osasun kontseilariak aitortu zuen ez dela «erraza» izango kopuru horiek murriztea eta lehengo egoerara azkar batean iristea. Halere, erantsi zuen izurritearen ondorioz jakin dutela zeintzuk diren telefono edo beste bitarteko teknologiko baten bidez egin beharreko kontsultak eta aurrez aurrekoak. Indurainek ohartarazi zuen neurriak hartuko dituztela.

Batetik, aurreikusten dute zerbitzu batzuk ehuneko ehunera iristea, betiere kontsultak arratsaldean irekita mantentzen badira. Beste zerbitzu batzuk, ordea, ezingo dira gehiengora iritsi, dituzten baliabideekin «beharrezkoa» baita segurtasun neurri bereziei eustea. Bestetik, jarduera kirurgikoetan ere aldaketak espero dira; besteak beste, ebakuntza gelak goizetan eta arratsaldeetan zabalik egongo direlako.

Taldeen erantzunak

EH Bilduren ustez, itxaron zerrendetako egoera «osasun eta gestio arazo bat» izan da, eta erantsi zuen azken urteetan izandako «gorabeherek» erabaki politikoekin izan dutela zerikusia. Geroa Bairen arabera, berriz, zerrendetako datuak ez dira «onak», baina orain osasun sistemaren «gaitasun osoa» berreskuratu behar da, nahiz eta birusak hemen jarraitu eta egoera okertu.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Bi pertsona maskarak soinean daramatzatela, autobusean. ©JUAN CARLOS RUIZ / FOKU

Lau gako asintomatikotasunaz

Arantxa Iraola

Kutsatu guztiek ez dituzte izaten sintomak. Adituek diote COVID-19an positibo emandakoen erdiek-edo, birusa izan arren, ez dutela batere sintomarik. Horrek zaildu egiten du izurriaren kontrola.

Herritar batzuk kalean maskara jantzita, Frantzian. ©CAROLINE BLUMBERG / EFE

Birusaren bigarren oldarraldia

Jone Bastida Alzuru

Kasuek ugaritzen jarraitzen dute munduan, eta hainbat herrialdek neurriak zorrozteko erabakia hartu dute. Israelek joan den ostiralean indarrean sartutako itxialdia gogortu du

Langile batzuk kaleak desinfektatzen, atzo, Azkoienen (Nafarroa). ©Idoia Zabaleta / Foku

Bigarren egunez, 800 kasu baino gehiago atzeman dituzte Hegoaldean

Uxue Rey Gorraiz

Osakidetzak jakinarazi du 9 urteko ume bat hil dela, birusa izanda. Positiboek gora egin dute Araba, Bizkai eta Gipuzkoan; Nafarroan, ez

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna