EAJ
«Adosteko borondatea»
Usadioari jarraituz, EAJk Zarautzen (Gipuzkoa) egin zuen urte politikoa hasteko ekitaldia, eta bertan izan ziren Andoni Ortuzar Euzkadi Buru Batzarreko lehendakaria eta Joseba Egibar Gipuzko Buru Batzarreko presidentea. «Kurtso oso beroa» iragarri zuen Ortuzarrek, Espainiaren gobernabideari nahiz Araba, Bizkai eta Gipuzkoakoari begira. Euskal Autonomia Erkidegoari dagokionez, aurrekontuei begira jarri zen, eta nabarmendu zuen kontuen proiektuaren %70etik gora «hezkuntzara, osasunera eta gizarte politiketara» bideratuko dutela: «Aurrekontuak ateratzeko erantzukizuna Jaurlaritzarena da, baina oposizioak bere aldetik jarri beharko du. Ondo pentsatu beharko dute, eta erabaki interes pertsonalak lehenesten dituzten, iaz egin zuten moduan, edo herritarren alde egiten duten».Espainiako egoera politikoaz jardun zuen nagusiki, ordea, eta Pedro Sanchez Espainiako Gobernuko jarduneko presidente eta PSOEko presidentegaiaren jokabidea kritikatu zuen, esanez udan ez diola «behin ere» hots egin: «Inbestiduran baiezko botoa ematera eramango gaituen negoziazio bat egiteko modu bitxia da». Ortuzarrek bestelako negoziazio eredu bat eskatu zuen, «serioa, diskretua eta parekoarekiko errespetuzkoa», eta agindu zuen EAJk «arduraz eta seriotasunez» jokatuko duela: «Eser gaitezen, adosteko borondatearekin, bestearen proposamenak kontuan hartuz. Adostuz. Beti egin den moduan. Jarrera horrekin ez badatoz, ez dute gure babesa hain erraz jasoko».
Giro horretan, EH Bilduri «koherentziarik gabe» aritzea egotzi zion, G7koen aurkako «show-a» sortu eta, aldi berean, Arnaldo Otegi EH Bilduko koordinatzailea Sanchezen inbestiduraren alde agertzeagatik: «Politika likidoa da horiena; are, gaseosoa, kea saldu baino ez dutelako egiten».
Datorren urtean jeltzaleek izango duten beste hitzordu bat gogora ekarriz amaitu zuen hitzaldia; EAJk 125 urte beteko ditu, eta Batzar Nagusia egingo du: «Aukera hau baliatu behar dugu alderdia indartuta eta gaztetuta irten dadin. Alderdi sendoa behar dugu, ideia berriekin, herri hau lideratzeko eta bere askapen nazional eta soziala lortzeko».
EH BILDU
Eskuinak oztopatzea xede
EH Bilduk, berriz, Donostiako Miramongo Parke Teknologikoan egin zuen ekitaldia, eta bertan hartu zuen hitza Otegik. Hark ere Espainiako eta Euskal Herriko koiuntura politikoei egin zien erreferentzia, eta, Madrili begira, nabarmendu zuen indar subiranistak «eskuineko gobernuak» eratzea oztopatuko duela: «EH Bilduk satisfazioz esan dezake hitza bete duela: erabakigarriak izan garen lekuetan ez dago eskuineko gobernurik: ez Madrilen, ez Arabako Errioxan, ez Nafarroan». Indar subiranistak bide horri jarraituko du aurrerantzean ere, Otegiren arabera: «Aurrez esaten dugu zer egingo dugun: ez dugu funanbulismo politikorik egin beharrik».Aitzitik, EH Bilduk«Madrilgo eta Parisko gehiengoen mende» egoteari utzi nahi dio, eta, horregatik, Euskal Herriaren burujabetzan sakontzea beharrezkotzat jo zuen Otegik. Horretarako, EH Bilduk «independentista eta aurrerakoi guztien etxe komun» izan behar du, eta hori «aliantzen» bidez gauzatu behar dela uste du: «Azken hauteskundeetan hazi egin gara, baina oraindik ez gara nahikoa, gehiago izan behar dugu». Era berean, kritika egin zien «elkarbizitzaren esparrua konfrontazio politikorako» baliatu nahi dutenei, erantsita ezker abertzalea «kontakizunen baturarekin engaiatuta» dagoela.
