Albistea entzun

Zazpi mahai antolatu dituzte

Astelehenetik aurrera, gobernu akordioa lantzeko zazpi atalez negoziatuko dute PSNk, Geroa Baik, Ahal Dugu-k eta Ezkerrak. Horiek hitzartu ondoren, autogobernuaz mahai politikoa eratuko dute
PSN, Geroa Bai, Ahal Dugu eta Ezkerrako ordezkariak, atzo, Iruñean, gobernu akordioa lantzeko bileran.
PSN, Geroa Bai, Ahal Dugu eta Ezkerrako ordezkariak, atzo, Iruñean, gobernu akordioa lantzeko bileran. JAGOBA MANTEROLA / FOKU Tamaina handiagoan ikusi

Joxerra Senar -

2019ko ekainak 28 - Iruñea

Nafarroako Gobernua eratzeko lanetan, ez dute baztertzen sanferminetan ere berriro biltzea. Astelehenean PSNk hiru alderdiri helarazitako dokumentua lanerako «oinarrizko tresna» izango da. Idatziari ekarpenak egin dizkiote Geroa Baik, Ahal Dugu-k eta Ezkerrak, eta astelehenetik aurrera zazpi mahai antolatuko dituzte legealdirako akordio programatikoa hitzartzeko. Gaur batzorde horietan zeinek parte hartuko duen zehaztuko dute.

Atzo arratsaldean, ordubete eskas iraun zuen haien bilerak. Negoziatuko dituzten zazpi atalak sailkatu zituzten: hezkuntza, kultura eta kirola; osasuna; berdintasuna, Nafarroa soziala eta gazteria; hizkuntza politika; enplegua, ekonomia eta zerga arloa; bizikidetza, memoria eta funtzio publikoa; eta tokiko administrazioa, ingurumena, iraunkortasuna, energia berdea. Horiek hitzartuta, azken mahai politiko bat eratuko dute: autogobernuari buruzkoa.

Aurrera egiteko borondate irmoa eta lasaitasuna azpimarratu nahi izan zituen Ramon Alzorriz PSNko Antolakuntza idazkariak: «Urratsez urrats joan behar gara, akordioak erdietsiz, tinko eta seguru. Herritarrek jakin behar dute helmugara iritsiko garela, eta, ondorioz, konfiantza eman nahi dugu 23 parlamentariko akordioa erdietsi eta etorkizuneko gobernu hori osatzeko. Bat egiten dugu denok helburu hori erdiesteko asmoan. Eta, batez ere, baikortasuna adierazi nahi dugu. Oinarri nahikoak badaude».

Geroa Baiko Koldo Martinez ere itxaropentsu agertu zen. «Gobernu aurrerakoi eta plurala egiteko apustu argia da. Akordio programatiko sendo bat behar dugu». Joan den astelehenean bezala, onartu zuen PSNk aurkeztutako dokumentuaren doinua «gustuko» dutela: «Orain, musika horri letra jarri behar diogu, eta, logikoki; puntu batzuetan erabat ados gaude, beste bertsoren batean gutxiago, eta beste pasarte batzuk erantsi egin nahi ditugu».

Datorren aste amaierarako akordioa erdiestea espero dute, baina, bestela, prest azaldu dira sanferminetan lanean jarraitzeko. 2015eko negoziazioetan gertatu bezala. Dena den, Geroa Baik azpimarratu zuen akordio «sakona» lortzea dela lehentasuna, eta presaren zein mamiaren artean oreka bilatu behar dela.

Ezein alderdik ez zuen aurreratu dokumentu horren edukia, baina sektoreen izenak aditzera ematen du jadanik non diren lehentasunak. Korapiloetako bat hizkuntza politika izan daiteke. Horri buruz galdetuta, Koldo Martinezek azaldu zuen PSNren agiriak dakartzan puntu nagusien filosofia politikoarekin bat egiten dutela. «Baina horiek garatu egin behar dira. Barkosen gobernuak egindako guztia filosofia berean oinarritzen da».

Goizeko bilerak

Bilera izan aurretik, goizean, Unai Hualde Nafarroako Parlamentuko presidentea banaka bildu zen Uxue Barkos Geroa Baiko eledunarekin, PSNko Maria Txibite eta Ramon Alzorrizekin, eta Navarra Sumako Javier Esparza, Carlos Perez Nievas eta Jose Suarezekin. Negoziazio prozesuari begira, «oso baikor» agertu zen Txibite goizean ere. PSNk ez du presarik. «Atzerapenak bidaide txarrak dira, ez badaude justifikatuta», Txibiteren arabera; «gauzak ongi egin behar dira».

Kezkatuta agertu zen PSNren hautagaia, negoziazioak aurrera egin ahala eskuina «konfrontazio politikorako erabiltzen ari delako Nafarroa». Egunotan, Espainiako hainbat komunikabide gezurrak eta erdi egiak zabaltzen ari direla kritikatu zuen, eta argi utzi estrategia horren aurrean PSOErekin «koordinazio bikaina» duela. Nahiz eta balizko inbestidura baterako gutxienez EH Bilduren abstentzioa beharko lukeen, Txibitek berretsi zuen ez dutela EH Bildurekin hitz egiteko asmorik.

Kezkatuta agertu zen Barkos ere, Nafarroaren «irudi desitxuratua» ematen ari direlako hainbat komunikabide «interes eta asmo politiko zehatzengatik». Haren irudiko, eskuina bilatzen ari da Nafarroa «truke txanpona» izatea. Berretsi zuen Nafarroarentzat egonkortasuna bermatzea dela garrantzitsuena, eta bide horretan «kide txarra« izan ohi dela «negoziazioen atzerapena». PSNk EH Bildu negoziazioetatik baztertzeko erabakiari buruz, Barkosek adierazi zuen alderdi sozialistari dagokion erabakia dela.

Esparza, berriz, haserre agertu zen. Biltzeko asmoz, hiru telefono dei egin dizkio Txibiteri, baina buruzagi sozialistak hiru aldiz erantzun dio ezetz. Navarra Sumako hautagaiaren arabera, «koherenteena» PSNk Navarra Sumarekin negoziatzea izango litzateke. Aurreko legealdian erakutsi bezala, proposamenen %80an ados daude PSNrekin, eta, haren ustez, aski litzateke gainerako %20 hori negoziatzea. Gogora ekarri duenez, bat egiten dute AHTaren auzian, Nafarroako ubidearen bigarren fasea eraikitzean, hizkuntz politikan, udal maparen legearen aurkako kritikan, enplegu planen beharraz...

Horregatik, Esparzak ez du ulertzen PSNk zergatik hartu duen beste norabide bat. «Herritarrek laukoaren politikei ezezkoa eman zieten hauteskundeetan, eta orain ematen du sozialistek laukoarekin batera gobernatu nahi dutela, Uxue Barkosen eta Adolfo Araizen politikak egiteko. PSNk porrot egin duen gobernu baten lidergoa izan nahi du».

Esparza ez da fio PSNz

Navarra Sumaren lehendakarigaiak dio ez duela sinesten PSNk EH Bildurekin negoziatuko ez duela. Haren ustez, «fokuak itzaltzen direnean EH Bildurekin hitzartuko du PSNk», eta Nafarroako Gobernua «nazionalisten menpe» geratuko da. Esparzak logika bakarra ikusten dio PSNren jokabideari: «Eserleku kontua da, bestela ez baitu zentzurik». Horregatik, «Maria Txibite Nafarroako Gobernuko lehendakari izan badaiteke ere, ez da nafarren lehendakari izango».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jose Maria Aznar eta Felipe Gonzalez Espainiako gobernuburu ohiak, maiatzean, Madrilen. ©BALLESTEROS / EFE

BASOARTE ZARBATSUA

Iosu Alberdi

Espainiako Gobernuak desklasifikatu zituen lehen agiri sekretuak GALen ingurukoak izan ziren, 1997. urtean. Halere, zenbait dokumentu ezkutuan mantentzea erabaki zuen Moncloak, «estatuaren segurtasunaren» izenean.

 ©J. DANAE / FOKU
 ©J. DANAE / FOKU
Bego Atxa eta Joseba Azkarraga, atzoko prentsaurrekoan. ©ANDONI CANELLADA / FOKU

Sarek Auzitegi Nazionalaren «blokeo jarrera» kritikatu du

Isabel Jaurena

Sare Herritarraren arabera, 47 euskal preso daude orain urruneko espetxeetan. «Presoengandik gertuen daudenen» jarrera nabarmendu du, erabakiak «jarraipen egokia» egin eta gero hartzeagatik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.