Albistea entzun

Udaltzaingoaren lan poltsarako ez da B2 maila behar, epaile baten arabera

Gasteizko Administrazio Auzitegiak onartu egin du UGTk jarritako helegitea. «Hizkuntza politika egitea» leporatu die Euskalgintzaren Kontseiluak auzitegiei
Bilboko udaltzain bi, Arriaga plazan.
Bilboko udaltzain bi, Arriaga plazan. ARITZ LOIOLA / FOKU Tamaina handiagoan ikusi

Julen Aperribai -

2022ko irailak 20

Aldeko sententzia jaso du UGTk Araban, Bizkaian eta Gipuzkoan udaltzain izateko lan poltsari jarri zion helegitean. Gasteizko Administrazio Auzitegiak ebatzi du ez dela beharrezkoa euskarazko B2 maila egiaztatzea lan poltsa horretarako sarbidea izateko. 2021eko deialdi publikorako oinarrien bigarren puntua baliogabetu du, eta agindu B2 maila ez duten hautagai guztiak deialdian onartzeko.

Jarritako helegitean, UGTk argudiatu zuen 2021ean egindako deialdi publikoak «diskriminatu» egin zituela euskarazko B2 maila aurkezterik izan ez zutenak, uste baitu, herritarrei euren hizkuntzan zerbitzua eskaintzeko gai ez diren arren, gaituta daudela «zenbait lanpostu» betetzeko.

Halaber, Gasteizko auzitegiak onartu egin du hautagaiek 2019aren aurretik egindako ikastaroak —Arkautiko Ertzaintzaren akademian (Araba) egindakoak— aurkeztu ahal izatea. Hala eskatu zuen UGTk, lan poltsa osatzeko prozedura bi urte geroago egin bazuten ere.

Izan ere, EAEko Poliziaren Legea aldatu zuten 2019an, eta udaltzaingoen lan poltsarako deialdian aldaketa hori epemugatzat jarri zen, ikastaroak euskarazko gaitasunen frogagiritzat aurkezteko orduan. UGTk, ordea, argudiatu du deialdia ez zetorrela bat lege horrek dioenarekin eta, beraz, deialdiaren xedea legea bera aldatzea dela.

UGTk BERRIAri adierazi dionez, sindikatu horren helburua ez da «euskararen kontra egitea», hizkuntza irizpideen kontra egin bazuten ere: «Euskadin, euskara errealitate bat da», azaldu du. Aitzitik, deialdi publikoari helegitea jartzeko arrazoia udaltzainen postuak betetzeko dagoen zailtasuna da, sindikatuaren arabera.

Izan ere, udalek deialdi publikoaren aurretik agortutako lan poltsak berritu izan balituzte, hizkuntza irizpidea bete beharrik ez zuketen izango, UGTk azaldu duenez: «Lan poltsak agortuta badaude, zergatik ez zabaldu? 700 udaltzain behar badituzu, baina 500i bakarrik uzten badiezu aurkezten, inoiz ez zara kopuru horretara iritsiko. Etxeko teilatura harriak jaurtitzea da».

UGTk ez ezik, CCOOk ere jarri zion helegitea Udaltzaingorako lan poltsari, hautagaiei B2 maila eskatzea «gehiegizkoa» dela argudiatuta.

Laudioko auziko epailea

Ana Maria Martinez epaileak eman du udaltzain izateko lan poltsari buruzko sententzia; hain justu, otsailean Laudioko Udalaren kontrako sententzia eman zuen epaile berberak. Orduan, udal hari agindu zion berriro har zezala 2020an zegokion hizkuntza eskakizuna ez egiaztatzeagatik kaleratutako bitarteko funtzionario bat.

Sententziak berak baino gehiago, haren argudioek eman zuten zeresana. Langile ohiaren aldeko epaia arrazoitzean, epaileak argudio hau erabili zuen: euskara «munduko hizkuntzarik zailenen zerrendan bosgarrena» dela, eta zenbait zerrendatan, berriz, «lehena».

Lehenago ere izan da hizkuntza eskubideen kontrako ebazpenik. Iazko maiatzean, esaterako, EAEko Justizia Auzitegi Nagusiak bertan behera utzi zituen Irungo Udalak hamabi udaltzain postutarako ezarritako hizkuntza eskakizunak, euskaraz ez dakitenentzat «diskriminatzaileak» zirela argudiatuta.

Hautsak harrotu zituen kasu hark. Irungo Udalak helegitea jarri zion ebazpenari, eta euskalgintzako hainbat eragilek gogor gaitzetsi zuten, hura euskaldunen hizkuntza eskubideen urraketa zelakoan. Euskalgintzaren Kontseiluak deituta, elkarretaratzea egin zuten EAEko Auzitegi Nagusiaren aurrean, eta euskaraz bizitzearen alde batu, Eskubide murrizketarik ez! lelopean.

Herritarren eskubideak

Oraingoan ere, Gasteizko Administrazio Auzitegiak emandako ebazpena «gogor» salatu du Kontseiluak. Herritarren eskubideen planora eraman du auzia, sententzia horien kontrakotzat jota.

Auzitegiek «herritarren eskubideen aurkako hizkuntza politika» egiten jarraitzen dutela salatu du Paul Bilbao idazkari nagusiak: «Onartezina da herritarren hizkuntza eskubideen urraketak betikotuko dituzten ebazpenak argitaratzea. Bada garaia herritarren eskubideak erdigunean kokatzeko. Auzitegien helburua herritarren interesak eta eskubideak defendatzea izan beharko litzateke, baina kontrako noranzkoan ari dira», adierazi du.

Auzitegiak, gainera, hizkuntza politika egiteko lanean tematuta ikusten ditu Bilbaok: «Azken hilabeteotan esaten ari gara auzitegiak hizkuntza politika egiten ari direla, euskaldunon eskubideen aurkako ofentsibari jarraitzen diotela. Alta, gaurko ebazpena kate horretako beste katebegi bat besterik ez da. Horrexegatik, honi guztiari modu bateratuan erantzun behar zaiola uste dugu».

Eusko Jaurlaritzaren Segurtasun Sailak adierazi du epaia sakon aztertu behar duela, baina aurreratu du «oso litekeena» dela ebazpenari helegitea jartzea, udaltzainek herritarrekin euskaraz egin ahal izatea «estrategikotzat» jotzen baitu. «Udalek egindako eskaera bat da, horretan arazo bat dagoela pentsatzen dutelako», adierazi dute; «euskara eskakizunak oinarrizkoak dira herritarrei zerbitzu hobea eskaini ahal izateko».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Donostia erietxearen aurrean egindako protesta. ©Goka Rubio / Foku

Langileek ez dute «hurbiltzeko borondaterik» ikusten Osakidetzaren partetik

Arantxa Iraola

Berriro ere elkarretaratzea egin dute Donostia ospitalearen aurrean.

AHTaren obretan aurkitutak gaztelu erromatarraren aztarnak ©Nafarroako Gobernua

AHTaren obrek ondare arkeologikoan eginiko kalteak salatzeko deialdia egin dute, bi soldadu erromatarren mamuen izenean

Isabel Jaurena

Erromatar gaztelu baten aztarnak topatu dituzte Tafallan (Nafarroa), eta Nafarroako Gobernuak AHTaren obrak geldiarazi ditu.

Estitxu Villamor Lomas eta Ortzi Akizu-Gardoki ikerlariak, Errekaleorren. ©ENDIKA PORTILLO / FOKU

Bestelako eredu baterako akuilu

Edurne Begiristain

Gasteizko Errekaleor auzoarentzat «mugarria» izan zen duela bost urte Iberdrolak argindar sarerako lotura moztu izana. Ordutik, auzo okupatua burujabea da energia elektrikoari dagokionez, eta bizimodu autogestionatuari esker, aztarna energetikoa murriztea lortu du.

Ortzi Akizu-Gardoki eta Estitxu Villamor Lomas ikerlariak, Errekaleorren. ©ENDIKA PORTILLO / FOKU

«Kontsumo ohiturak aldatuz egingo da trantsizioa»

Edurne Begiristain

EHUko bi ikertzaileek lehen aldiz kalkulatu dute auzo baten aztarna energetikoa. Gasteizko Errekaleor auzo komunitario eta autogestionatua izan dute aztergai.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.