Bi agiri erkatu behar dira aldea ikusteko: lehengo urtekoa, eta aurtengoa. Iazkoa maiatzaren 22koa da, Eusko Jaurlaritzako Hezkuntza Saileko Langileak Kudeatzeko zuzendariarena. Aurtengoa ere harena da, apirilaren 27an egindakoa. Biek helburu bera dute: Berritzegune Nagusian «kolaboratzaile» jarduteko hainbat lanpostu betetzeko deialdia egitea hezkuntza sisteman lanean ari diren profesionalentzat. Iazkoak derrigorrez hautaketa prozesuan euskaraz jardutea eskatzen zuen; aurtengoak, ez. Prestakuntzan eta hezkuntzaren berrikuntzan laguntzeko zentroak dira Berritzeguneak.
Ikusi gehiago:Idurre Eskisabel: «Oldarraldiaren efektuetako bat da neurri kontserbadoreak hartzea»
Bi ebazpenen arabera, langile guztiek bete behar dute administrazioak hezkuntzarako jarritako 2. hizkuntza eskakizuna; hor ez da aldaketarik. Baina propio Berritzegunean lanean hasteko egin behar izaten den ahozko aurkezpenaren gaineko hizkuntza eskarian apaltze bat dago. «Defentsa euskaraz egingo da» jartzen du iazko ebazpenean. Derrigortasun hori kendu egin dute heldu den ikasturtera begira egin dutenean. Zera jarri dute: «Defentsa ahal bada euskaraz egingo da».
Garrantzi handiko proba
Lanpostuak betetzeko eskatzen zaizkien gainerako eskeez harago, ahozko proba hori da hautaketa prozesuan pisu handiena duena. Memoriaren «ahozko defentsak» zortzi puntu eman ditzake. Proba horrek, gainera, aparteko garrantzia du: «Prozesutik kanpo geratuko dira memoriaren defentsari eman dakiokeen puntuazioaren %50 gutxienez lortu ez dutenak». Memoria horri egiten zaizkion eskarien artean dago izaera «berritzailea» izatea. Hezkuntza Sailak azaldu du motibo «juridikoak» daudela aldaketaren atzean. Argudiatu du behin ja hizkuntza eskakizuna ezarrita, ezin dela behartu probak hizkuntza ofizial bakar batean egitera.
