Urruntze politika salatu dute EAJk, EH Bilduk eta Podemosek

Sarek eramandako proposamena eraman dute Eusko Legebiltzarrera. Marlaskak atsekabea berretsi du Gonzalez Solaren heriotzagatik
Manifestazioa Bilbon, Igor Gonzalez Solaren heriotzaren harira.
Manifestazioa Bilbon, Igor Gonzalez Solaren heriotzaren harira. ARITZ LOIOLA//FOKU Tamaina handiagoan ikusi

Maria Ortega Zubiate -

2020ko irailak 17

Igor Gonzalez Sola euskal presoaren heriotzaren harira, adierazpen bat sinatu zuten atzo EAJk, EH Bilduk eta Elkarrekin Podemosek Eusko Legebiltzarrean, Sare mugimenduaren ekimenez. Hiru eskaera bildu dituzte dokumentu horretan: urruntze politika amaitzea eta presoak Euskal Herrira ekartzea; gaixotasun larriak dituzten presoak aske uztea; eta graduen progresioa aplikatzea, gainerako presoei bezala.

Irailaren 4an aurkitu zuten ziegan hilik Gonzalez Sola presoa. 48 urte zituen. 2005ean atxilotu zuten, eta, parlamentuko hiru taldeek gogora ekarri dutenez, «urruntze politikaren biktima» izan zen, nahiz eta azken hilabeteak Martuteneko espetxean egin zituen, Gipuzkoan: aurretik, Badajozko, Valdemoroko eta Soriako kartzeletan eduki zuten. Nabarmendu dute jada zigorraren hiru laurdenak beteak zituela, eta aske behar zuela. Gainera, osasun arazoengatik tratamenduan zegoela azpimarratu zuten. «Horrek ustez heriotza ekarri dio».

Euskal presoen aurkako neurriak bertan behera uzteko eskatu dute adierazpenean. Areago, gogora ekarri dute euskal presoen egoera aldatzeko eskaerak egin dituztela orain baino lehen hainbat erakundek, eta adostasun zabala lortu dutela aldarri horiek.

Sanchezekin bat

Kontrol saioa izan zuten atzo Espainiako Kongresuan, eta Gonzalez Solaren heriotzaz galdetu zion gobernuari Ignacio Gil Lazaro Voxeko diputatuak. Pedro Sanchez Espainiako Gobernuko presidenteak «atsekabea» azaldu zuen joan den astean presoaren heriotzaren harira, eta atzo Voxek salatu zuen hori biktimei «traizio» egitea dela. Presidentearen hitzak babestu zituen, ordea, Fernando Grande-Marlaska Barne ministroak: «Humanismoan ez dago lekurik preso baten heriotzaz pozteko».

Grande-Marlaskak «balio demokratikoen» goraipamena egin zuen. Haren hitzetan, «balio demokratikoekin eta zuzenbide estatuarekin» lortu zuten ETAri aurre egitea. Voxen jarrera deitoratu zuen: «Ez dakizue ETA gabe bizitzen. ETA erabiltzen duzue espainiarren artean konfrontazioa sortzeko».

Voxek bakarrik ez, PPk ere jo zuen atzoko bilduran Espainiako Gobernuaren aurka Gonzalez Solaren heriotzaren harira samina azaltzeagatik. ETAren biktimei barkamena eskatzea galdegin zion Pablo Casado PPko presidenteak Sanchezi.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna