Albistea entzun

Monteroren aurkako sorgin ehiza

Espainiako Berdintasun ministroaren aurkako «indarkeria politikoa» salatu du Unidas Podemosek, eta neurriak hartzeko eskatu du
Irene Montero, asteazkenean, Espainiako Kongresuan.
Irene Montero, asteazkenean, Espainiako Kongresuan. ZIPI / EFE Tamaina handiagoan ikusi

Iosu Alberdi -

2022ko azaroak 25

«Zuk duzun meritu bakarra da Pablo Iglesias sakonki aztertu izana»: hitz horiekin zuzendu zitzaion Voxeko diputatu Carla Toscano Espainiako Berdintasun ministro Irene Monterori, Espainiako Kongresuko osoko bilkuran, herenegun. Podemoseko kideak askotariko isekak entzun ditu ministro denetik —baita aurrez ere—, baina azken asteetan nabarmen areagotu dira, zenbait epailek Soilik baietz da baietz legeaz egindako interpretazioak direla medio. Monteroren kontrako «indarkeria politikoa» salatu du Podemosek, eta eskuin muturraren jarrera matxisten aurkako erantzun bateratu bat eskatu: «Gorroto mediatiko eta politikoaren aurrean, eskubide gehiago».

«Ezgauza», «inozoa», «ergela», «heldugabea», «-ren bikotekidea»... Eskuineko eta eskuin muturreko politikari, kazetari eta iritzi emaileek Monteroren aurka erabilitako hitzetako batzuk dira. Halakoak, gainera, ugaritu egin dira orain. Espainian sexu askatasunaren kontrako delituak epaitzeko indarrean den legeak eragindako harrabotsa baliatu du eskuinak Espainiako Gobernuaren aurka egiteko, eta Montero jarri dute kritiken eta deskalifikazioen jomugan. Horiek gorantz egin dute epaitegiek zigorrak murrizteko ebazpenak onartu ahala, Toscanok «asko ukitzear egon diren muga bat» gainditu duen arte, ministroaren hitzetan.

Monteroren esanetan, borroka feminista «balaztatzeko» helburua dute azken asteetako erasoek, eta «indarkeria politiko» horren inguruan hausnartzeko deia egin du, Toscanoren hitzak testuinguruan jarriz. «Egun askotan muga bat ukitzear bazaude, errazagoa da indarkeria politikoa hedatzeko estrategia duen norbaitek bere burua nahikoa legitimitaterekin ikustea muga gainditu eta zigorgabe geratzeko», azaldu du Ser irrati katean.

Ikusi gehiago: Bira. Onintza Enbeita: Indarkeria

Toscanoren hitzek zur eta lur utzi zituzten diputatu ugari, eta haren hitzartzea etenaraziz erantzun zuten. «Begirune parlamentarioaren degradazioaren hondoraino iritsi gara», adierazi du EAJko eledun Aitor Estebanek, eta gogorarazi halakoak ez direla salbuespena Voxeko kideen artean. EH Bilduko Mertxe Aizpuruak, berriz, «lotsagarritzat» jo du Monterok pairatutakoa: «Izugarria iruditu zait azken asteetan jasan duen jazarpena».

Jazarpen hori bestela definitu du Espainiako gobernuburu Pedro Sanchezek: «Eskuinaren eta eskuin muturraren hooliganismo politikoa». Yolanda Diaz presidenteordeak, berriz, neurriak aztertzea iradoki dio Kongresuari, halako jarrerak zigortu beharrekoak diren zehazteko. Bide horretatik, UP Unidas Podemosek idatzi bat aurkeztu du, eta zenbait alderdik adierazi dute aztertuko dutela. ERCk, berriz, Kongresuko Mahaiari eskatu dio «bere burua baliarazteko»; PPri, berriz, isilik ez geratzeko, gero «Moncloara faxismoarekin iristen saiatzeko».

Are gehiago, UPko eledun Pablo Echeniqueren ustez, Voxen jarrera horiek ez lirateke posible izango PPren «kolaboraziorik» gabe. Izan ere, Alderdi Popularrak sarri jo du Monteroren aurka, nahiz eta oraingoan Cuca Gamarra idazkari nagusi eta Kongresuko eledunak adierazi duen inork ez duela eskubiderik ministroa «iraintzeko» eta «bere bizitza pertsonalean sartzeko».

Nazioartetik ere jaso du babesa Monterok. Txileko eta Argentinako presidenteek ministroaren aurkako «indarkeria politikoa» salatu dute, eta elkartasuna adierazi diote: «Ez zaude bakarrik». Jean-Luc Melenchon Frantziako LFIko buruzagia, berriz, harrituta agertu da «Espainiako eskuinaren indarkeriazko metodo politikoekin».

«Liskarra»

Toscano Voxen ordezkaria da Kongresuko Berdintasun Batzordean, eta sarri egin du Berdintasun Ministerioaren eta, oro har, mugimendu feministaren aurka. Besteak beste, argudiatu du biktimei ematen zaizkien laguntzak direla indarkeria matxistagatik egindako salaketen igoeraren arrazoia, eta haiek artatzen dituzten elkarteentzako diru laguntzen aurka agertu da.

Ez hark, ez alderdiak ez dute atzera egiteko imintziorik egin, eta Victor Sanchez de Real Voxeko diputatuak «moja ikastetxe bateko liskar» gisa kalifikatu ditu Monteroren aurkako hitzak. Gehitu du eurek ere isekak jasaten dituztela, Vox eurek abiatutako sorgin ehizaren biktima gisa aurkeztu nahian.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Irango protestei elkartasuna adierazteko elkarretaratze bat, joanden azaroan, Australiako Parlamentuaren parean, Canberran. ©LUKAS COCH, EFE

Iranek herritar bat exekutatu du, azken hilabeteetako protestekin lotuta

Gorka Berasategi Otamendi

Kondenatuari —23 urte— estatuko indarren agente bat labanaz zauritzea egotzi diote. Agintari judizial gorenaren esanetan, «aurki» gauzatuko dituzte mobilizazioen harira ezarritako beste heriotza zigor batzuk ere.

Benjamin Netanyahu Israelgo lehen ministro ohia, herrialdeko parlamentuan, joan den azaroaren 15ean. ©ABIR SULTAN, EFE

Netanyahuk gobernua eratzeko akordioa itxi du ultrekin eta muturreko ortodoxoekin

Gorka Berasategi Otamendi

Shas eta Sionismo Erlijiosoa alderdien esku geldituko dira, besteak beste, Barne eta Ogasun ministerioak. Smotrich ultranazionalistak Zisjordaniaren gaineko botere handia pilatuko du.

Ecowaseko ordezkariak eta Gineako junta militarrekoak elkarrekin, iazko irailean Konakryn egin zuten bilera batean. ©STR / EFE

Afrika mendebaldeko estatuek indar militar bat eratuko dute

Gorka Berasategi Otamendi

Ecowasen xedea da egonkortasuna bermatzea estatu kolpeek astindutako eskualde horretan. Maliri, Gineari eta Burkina Fasori eskatu die azkartu dezatela boterea zibilei itzultzeko prozesua

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.