HITZ ETZANAK
Portutik
Itsas portuek badute abenturatik. Isaac Albeniz musikariak 8 urte zituela ihes egin zuen Madrilgo etxetik. Andaluziako itsas herri batera iritsi, barrabaskeriaren bat egin, eta poliziak atzetik zituela, fragata batean ezkutatu zen. Nekearen nekeaz lokartu, eta, esnatu zenerako, ontzia abian zen Ameriketarantz. Ausarta eta bihurria ez ezik abila ere bazen mutikoa, eta Puerto Ricon piano kontzertu arrakastatsuak eskainiz atera zuen hasieran bizimodua.
Badute minetik ere itsas portuek. Serantes edo Aitana mendiek emango ligukete gerratik ihes zihoazen ume eta ez ume haien malkoen lekukotza. Badute despedidatik ere. Txirrita bera ere han omen zen Pasaiako portuan Pedro Maria Otañori agur egitera bildu zirenen artean. Badute, noski, bidaia amaigabeen hasieratik. Marco amaren bila itsas portu batetik abiatu zen. Eta badute bidaia luzeen azken hatsetik ere. Askotan ikusi dugu munduari bira eman ondorengo Elkano nekatua. Badute literaturatik itsas portuek. Badute zinematik...
Baina batzuetan, gure errealitaterik hitsenaren aurrez aurre jartzen gaituzte itsas portuek. Bilboko portutik gerrara zen atzoko albistearen izenburua. Ukrainarantz doazen ibilgailu blindatu horiek itsas portuei buruzko nire iruditeria itsustu baino ez dute egin...
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
