Albistea entzun

HITZ ETZANAK

Konparaketa

Andoni Egaña -

2021eko apirilak 6

Imanol Lazkanok hitz hauekin hasten zuen txiste baten kontaketa: «Bazen Nafarroako Erriberan mutil ile-gorri bat, aurpegian ikuiluko bonbilak baino peka gehiago zituena». Txisteak berak baino grazia handiagoa egiten zidan mutila aurkezteko moduak...

Euskaraz ez dugu konparaketarako eta hiperbolerako halako ohiturarik. Akaso sintaxi kamustuak gain hartu digulako, erori egiten zaigu konparaketaren bigarren zatia, eta grazia galtzen du: «Binbo ogiaren alanbrea baino galduago dabil»-ek ez du gazteleraz esaldi berak duen esanindarrik. Hiztun onak baditu irtenbideak. «Galduago dabil, galduago...» dioenak, belarriak tentetuarazten dizkio gero «...Binbo ogiaren alanbrea baino» entzun behar duenari. Baina ahaztu zaizkigu hizkuntzaren baitako formula horiek. Orain, alferraren alferrez, nahiago dugu dena hurrengoa-rekin konpondu. «Ez da mantsoa, hurrengoa baizik». «Ez da ederra, hurrengoa baizik». Eta horrek ez du inoren mantsotasuna edo edertasuna adierazten, esalearen ezina baizik.

Futbol-asteburu honek hizkuntzari mesedetxo bat egin dio. Herritar gehien-gehienok behar bezalako jokabidea izan dugun bitartean, bestela ibili direnak ere izan dira. «Tontoagoa haiz tontoago, semaforotik salto egin zuena baino» esaera zahar bihurtuko da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.