Aparkatuta

Harritu egin ninduen datuak. Jasangarritasunaz eta ekonomia zirkularraz ari zela, Harvarden irakasle den Manuel Maquedak esan zuen autoen erabilera %4koa dela, gainerako denboran aparkaturik egoten direla. Eta, aldiz, autoen inguruko sistema oso bat eraiki dugula—materiala lortzeko lurra induskatu, ekoitzi, erabili eta bota— gure denboraren %4an baino erabiltzen ez ditugunean.

Kontuak ateratzen hasi nintzen gero. Demagun Zarautzen bizi den pertsona batek Donostian egiten duela lan eta egunero atzera-aurrera autoan egiten duela. Jo ordubete egunero, astelehenetik ostiralera. Gero, larunbatean, bidaia luzeago bat egiten duela —Ikeara jarriko dugu sinesgarri gerta dadin—. Zarautz-Barakaldo joan-etorria, bi ordu. Eta igandez, Jaizkibelen mendi buelta bat egiteko berriz hartu duela autoa. Beste ordubete. Zortzi ordu guztira, astean. Asteak orotara 168 ordu dituela kontuan hartuta, ez da iristen %5era autoan pasatu duen denbora. Irakaslearen datua ez zen, beraz, oso okerra. Eta, gainera, balizko bizimodu hau egiten duena ez zait iruditzen autoan gutxi dabilenik...

Gure bizitzaren arlo bat baino ez da autoarena. Oro har, mundumodu zaharrari eutsi nahi dionak, berria ekarri. Mundu berri bat sortzeko bidean, zaharra ez da txarra.