Albistea entzun

BIRA

Chato

Onintza Enbeita -

2020ko martxoak 31

Sabinoren laguna zinen hasieran, guztiona amaieran. Kongresuaren ingurura arrimatzen zinen bakoitzean, «orain ere badugu zerbait», pentsatzen nuen. Zure poltsan guretzako etxeko lanak eta kaleko haize freskoa ekartzen zenizkigun. Gogoratzen zaitut esateko geneukana entzuten, egindako lana eskertzen eta erretiratzeko asmorik batere ez zenuela ulertarazten. Sabino eta zurekin lehen aldiz bazkaldu nuen egun hura bihotzean gordeta daukat. Interpelazio gogor baten ostean izan zen. Txalo egin zenidan, zoriondu egin ninduzun, eta gero barre eta barre eta barre egin genuen. Madrildik itzuli eta gero ere, beti jakin dut hor zaudela. Egunkarietan ikusi zaitut frankismoaren inpunitatearen kontrako ekimenetan, eta Sabinok kontatu izan dit nondik nora zabiltzaten. Zure heriotzaren notizia gordina heldu zaidan honetan, harrotasunez aitortu diot neure buruari zeu ezagutzearen plazera izan dudala.

Errepresiorik gogorrenari eutsi zeniona koronabirusak eraman zaitu. Gorroto zenuen kapitalismoak indartsu egin duen birusak. Poz bat gelditzen zait: zeure denbora guztian kapitalismoaren eta frankismoaren kontrako birus nekaezina izan zarela pentsatzea. Muxu handi bat joan zaren lekuraino, Chato. Badakigu zein den poltsan zenekarkigun azken etxeko lana: ez dugu amorerik emango lortu arte.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.