Albistea entzun

EuskoLegebiltzarreko inbestidura saioa. Gobernu akordioa. ANALISIA

Adostutako desadostasunak

Andoni Ortuzar EBBko burua eta Unai Uhalde Nafarroako Parlamentuko presidentea, atzo.
Andoni Ortuzar EBBko burua eta Unai Uhalde Nafarroako Parlamentuko presidentea, atzo. DAVID AGUILAR / EFE Tamaina handiagoan ikusi

Jon O. Urain -

2020ko irailak 4

Gatazkaz eta adostasunaz mintzatu ziren egunkari honetan Daniel Innerarity eta Jule Goikoetxea abuztuaren 23an; gatazkak eta adostasunak demokraziaren —demokratizazioaren— funtzionamenduan betetzen duten rolaz. Nork bere posiziotik, topagune bat aurkitu zuten; gatazka beharrezkoa da aurrera egiteko, baina gatazka orok behar du adostasun fase bat, gatazka politikoak ereindako uzta jaso ahal izateko. Adostasunik ezean, su txikian gorbezitutako platera izan daiteke gatazka.

Herri honen mendebaldean, autogobernua da su txikian kozinatzen ari den gatazka nagusietako bat. Lau hamarkada Euskal Autonomia Erkidegoaren zutoinak ezarri dituen estatutua erabat bete ezinik, eta gutxienez bi hamarkada hura berritzeko saio instituzionalak martxan jarri zirenetik. Harrezkero igaro dira autogobernu batzorde bat, Madrilek akabatutako estatutu proiektu bat, hiru lehendakari eta bost legealdi.

Juan Jose Ibarretxe buru zuen Jaurlaritzak aurkeztu zuen estatutu proiektuak albo ondorio ugari izan zituen, eta horietako bat izan zen PSE-EEren posizio aldaketa. 2001-2005eko legealdian, Eusko Legebiltzarrak estatutugaia onartu baino 11 egun lehenago, Estatutu gehiago ongizate gehiagorako. Gernikako estatutua erreformatzeko eta eguneratzeko oinarriak izeneko dokumentua aurkeztu zuten sozialistek. Bazuen berritasun bat: estatutua betetzeaz harago, hura eguneratzeko beharra azpimarratzen zuten. Gero iritsi ziren Loiola, Patxi Lopezen gobernua eta Urkullurena; azken zazpi urteetan eskutik gobernatu dute sozialistek eta jeltzaleek Jaurlaritzan; egonkortasun akordio bat eginez eta aurrekontuak adostuz lehenbizi, eta Jaurlaritza konpartituta ondoren.

Horregatik, deigarria da nola bi indar politikoak, gobernu akordioaren negoziazio lanetan aritu direnean, mugatu diren estatutua berritu behar dela adostera, edukietan sakondu gabe. Zazpi urteko bat egiteek ez dute balio izan EAJk eta PSE-EEk autogobernuaren alorrean irizpide komun bat adosteko: «Bi alderdiok 2016ko azaroan sinatutako itunaren edukiak berresten ditugu, eta askatasuna aitortzen diogu elkarri, bakoitzak bere postulatuak eta planteamenduak defendatzeko». Baina adostasunak (eta, beraz, adostasunaren barruan kabitzen ez denak) marko jakin bat definitzen dute: zer den garrantzitsua agenda politikoa ezartzerakoan, eta zer ez; zerk merezi duen gobernu baten lau urteko jardunean konpromiso bat hartzea. Eta zerk ez.

Hortaz, Jaurlaritza konpartituko duten bi indarrak ez badira gai hiru probintzien egituraketa berrian ados jartzeko eta Eusko Legebiltzarreko Autogobernu Lantaldeak adostutako oinarri eta printzipioen inguruko akordioa ez bada topagune bat, gobernuko alderdiek lau urte dituzte alor horretan zer sakondu eta egin nahi duten —eta norekin egin nahi duten— argitzeko. Kartak mahai gainean jartzeko garaia da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

«Utopien funtzioa energien aktibazioa da»

«Utopien funtzioa energien aktibazioa da»

Jon O. Urain

Nola irudikatu gizarte hobeak, ipar gisa hartu eta bideari ekiteko. Utopiak ez dautza gatazkarik ezean, Martinezen ustez, gatazka «modu justuagoan» kudeatzean baizik. Gizarte hobeak ez baitira «zerutiarrak»: «Beti egongo dira egitekoak».

 ©J. DANAE / FOKU
Jose Maria Aznar eta Felipe Gonzalez Espainiako gobernuburu ohiak, maiatzean, Madrilen. ©BALLESTEROS / EFE

BASOARTE ZARBATSUA

Iosu Alberdi

Espainiako Gobernuak desklasifikatu zituen lehen agiri sekretuak GALen ingurukoak izan ziren, 1997. urtean. Halere, zenbait dokumentu ezkutuan mantentzea erabaki zuen Moncloak, «estatuaren segurtasunaren» izenean.

 ©J. DANAE / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...